തലശേരി: മലബാറിലെ പുരാതന മുസ്ലിം കുടുംബങ്ങളിൽ നിന്നും ആദ്യമായി ഇംഗ്ലീഷ് വിദ്യാഭ്യാസം നേടിയ മാളിയേക്കൽ മറിയുമ്മയെ കാണാൻ മുൻ മുഖ്യമന്ത്രി ഉമ്മൻചാണ്ടിയെത്തി. ടി.സി മുക്കിലെ വസതിയിലാണ് ഉമ്മൻചാണ്ടി മറിയുമ്മയെ കാണാനായി എത്തിയത്.
മുഹമ്മദ് അബ്ദുറഹ്മാൻ സാഹിബ്, കെ.പി. കേശവമേനോൻ, നഫീസത്ത് ബീവി തുടങ്ങിയ പ്രമുഖ നേതാക്കൾ ഒരുകാലത്ത് ചെന്നെത്തിയിട്ടുള്ള മാളിയേക്കൽ തറവാട്ട് അംഗമായ മറിയുമ്മയെ കാണാനും സുഖവിവരങ്ങൾ ആരായാനുമാണ് ഉമ്മൻചാണ്ടി ഇന്നലെ എത്തിയത്.
കോൺഗ്രസ് നേതാക്കളായ കണ്ടോത്ത് ഗോപി, കെ. ശിവദാസൻ, എം.പി. മുരളി, പ്രദീപ് വട്ടിപ്രം തുടങ്ങിയ നേതാക്കളും ഉമ്മൻചാണ്ടിയോടൊപ്പമുണ്ടായിരുന്നു. നേതാക്കൾക്കൊപ്പമുള്ള പഴയകാല ചിത്രങ്ങൾ കാണിച്ച് മുൻകാല രാഷ്ട്രീയ പ്രചാരണ ചരിത്രങ്ങൾ ഓർമയിൽ നിന്നും പൊടിതട്ടിയെടുത്ത് മറിയുമ്മ ഏറെ ആഹ്ലാദത്തോടെയാണ് നേതാക്കളോട് സംവദിച്ചത്.
