ന്യൂഡല്‍ഹി: രാജ്യത്തെ 27 പൊതുമേഖലാ ബാങ്കുകളെ പരസ്പരം ലയിപ്പിച്ച് ആറോ ഏഴോ വലിയ ബാങ്കുകള്‍ ആക്കാന്‍ ആലോചന. കിട്ടാക്കട പ്രശ്‌നത്തില്‍ നട്ടം തിരിയുന്ന ബാങ്കുകള്‍ക്കു പുനരുജ്ജീവനം നല്കാന്‍ അതേ മാര്‍ഗമുള്ളൂ എന്നാണ് ഗവണ്‍മെന്റ് കരുതുന്നത്. ജൂണ്‍ ആറിനു ധനമന്ത്രി അരുണ്‍ ജയ്റ്റ്‌ലി പൊതുമേഖലാ ബാങ്കുകളുടെ തലവന്മാരുമായി നടത്തുന്ന കൂടിക്കാഴ്ചയില്‍ ലയനകാര്യവും ചര്‍ച്ചയാകും.
അഞ്ചു പ്രമുഖ പൊതുമേഖലാ ബാങ്കുകള്‍ വലിയ നഷ്ടം രേഖപ്പെടുത്തിയ പശ്ചാത്തലത്തിലാണ് ഈ കൂടിക്കാഴ്ച. അഞ്ചു ബാങ്കുകള്‍, മാര്‍ച്ചിലവസാനിച്ച മൂന്നുമാസം 16,000 കോടിയില്‍പരം രൂപയുടെ നഷ്ടമാണു വരുത്തിയത്. കിട്ടാക്കടങ്ങള്‍ക്കും കിട്ടാക്കടങ്ങളാകാന്‍ സാധ്യതയുള്ള വായ്പകള്‍ക്കും വേണ്ടി തുക വകയിരുത്തിയതാണു നഷ്ടകാരണം. വരുന്ന ത്രൈമാസങ്ങളിലും ഇങ്ങനെ വകയിരുത്തല്‍ വേണ്ടിവരും. അടുത്ത വര്‍ഷം മാര്‍ച്ചോടെ ബാങ്കുകളുടെ കിട്ടാക്കടഭാരം ഇല്ലാതാക്കണമെന്നാണു റിസര്‍വ് ബാങ്കിന്റെ നിര്‍ദേശം.
സ്റ്റേറ്റ് ബാങ്കിന്റെ അഞ്ച് അസോസ്യേറ്റ് ബാങ്കുകളും ഭാരതീയ മഹിളാ ബാങ്കും സ്റ്റേറ്റ് ബാങ്ക് ഓഫ് ഇന്ത്യയില്‍ ലയിപ്പിക്കാന്‍ നടപടി തുടങ്ങിക്കഴിഞ്ഞു. ബാങ്കുകള്‍ ഇ തിനായി ഡയറക്ടര്‍ ബോര്‍ഡ്‌യോ ഗങ്ങളില്‍ പ്രമേയം പാസാക്കി ഗവണ്‍മെന്റിന്റെ അനുമതിക്കയച്ചു.
മറ്റു പൊതുമേഖലാ ബാങ്കുകളിലെ ലയന നടപടി കുറേക്കുടി വ്യത്യസ്തമായിരിക്കും. 27 പൊതുമേഖലാ ബാങ്കുകളാണു സ്റ്റേറ്റ് ബാങ്ക് ഗ്രൂപ്പിനു പുറമേ ഉള്ളത്. അവയെല്ലാം കൂടി 74 ലക്ഷം കോടി രൂപയുടെ ആസ്തി ഉണ്ട്. ശരാശരി 12 ലക്ഷം കോടി രൂപ ആസ്തിയുള്ള ആറു ബാങ്കുകളായി ഇവയെ പുനഃസംവിധാനം ചെയ്യാനാണ് നീക്കം.
രാജ്യത്തെ ബാങ്കുകളില്‍ കിട്ടാക്കടവും പ്രശ്‌നകടവും ആയി ഏഴരലക്ഷം കോടി രൂപ ഉണെ്ടന്നു കണക്കാക്കുന്നു.
വൈദ്യുതി, ഖനനം, സൗരോര്‍ജം, കല്‍ക്കരി, സ്റ്റീല്‍, ടെലികോം തുടങ്ങിയ മേഖലകളില്‍ നല്‍കിയ വായ്പകളാണു കിട്ടാന്‍ പറ്റാത്ത നിലയിലായത്. സര്‍ക്കാര്‍ നയം മുതല്‍ ആഗോള ബിസിനസ് മാന്ദ്യം വരെ പല കാരണങ്ങളാലാണു കിട്ടാക്കടമായത്.
നഷ്ട ബാങ്കിംഗ്
മാര്‍ച്ച് 31ന് അവസാനിച്ച മൂന്നുമാസം പ്രധാന പൊതുമേഖലാ ബാങ്കുകള്‍ വരുത്തിയ നഷ്ടം കിട്ടാക്കടങ്ങള്‍ക്കു കൂടുതല്‍ തുക വകയിരുത്തിയതു മൂലമാണ് നഷ്ടം. 2017 മാര്‍ച്ചിനകം കിട്ടാക്കടങ്ങള്‍ തുടച്ചു മാറ്റണമെന്ന റിസര്‍വ് ബാങ്ക് നിര്‍ദേശത്തെ തുടര്‍ന്നാണ് കൂടുതല്‍ വകയിരുത്തല്‍ നടത്തിയത്.
(നഷ്ടം കോടി രൂപയില്‍)
പഞ്ചാബ് നാഷണല്‍ ബാങ്ക് 5367.14
ബാങ്ക് ഓഫ് ഇന്ത്യ 3587.00
ബാങ്ക് ഓഫ് ബറോഡ 3230.10
സിന്‍ഡിക്കറ്റ് ബാങ്ക് 2158.17
യൂക്കോ ബാങ്ക് 1715.16
