കൊച്ചി: എറണാകുളം കച്ചേരിപ്പടി സെന്‍റ് ആന്‍റണീസ് സ്കൂളിലെ ഗ്രീൻ റൂമിലിരുന്ന് മത്സരാർഥികൾക്ക് മേക്കപ്പിടുമ്പോൾ തൃപ്പൂണിത്തുറ ഗോവിന്ദരാജുവിന്‍റെ മനം നിറയെ പഴയ നാടക കാലത്തെക്കുറിച്ചുള്ള നിറമുള്ള ഓർമകളാണ്.
20-ാം വയസു മുതൽ തുടങ്ങിയ നാടകാഭിനയം 60 ലധികം വേദികളിൽ 16 ഓളം നാടകങ്ങളിലൂടെ ഗോവിന്ദരാജുവിനെ പ്രശസ്തനാക്കി. നാടക നടനിൽ നിന്ന് മേക്കപ്പ് ആർട്ടിസ്റ്റിലേക്ക് ചുവടുമാറിയ ഇദ്ദേഹംഇത്തവണയും ജില്ലാ സ്കൂൾ കലോത്സവത്തിനെത്തി.
കഴിഞ്ഞ 30 വര്‍ഷമായി സ്‌കൂള്‍ കലോത്സവരംഗത്ത് മേക്കപ്പ് ആര്‍ട്ടിസ്റ്റാണ് ഗോവിന്ദരാജു. തിരുവാതിര കളി, ഒപ്പന, ഭരതനാട്യം, മോഹിനിയാട്ടം, കുച്ചുപ്പുടി, മാര്‍ഗംകളി, കേരളനടനം, ഇരുളനൃത്തം തുടങ്ങിയ നൃത്ത ഇനങ്ങള്‍ക്കായാണ് ഇദ്ദേഹം വിദ്യാര്‍ഥികൾക്ക് ചമയമിടുന്നത്.
തൃപ്പൂണിത്തുറ ഭാസഭേരി തയറ്റര്‍ ഗ്രൂപ്പിലൂടെ അമേച്വര്‍ നാടക രംഗത്തെത്തി. ടി.എല്‍ ജോസിന്‍റെ വിഷക്കാറ്റ്, മരട് രഘുനാഥിന്‍റെ ഹിപ്പോക്രസി എന്നിവ അതില്‍ പ്രധാനപ്പെട്ടതാണ്. തൃപ്പൂണിത്തുറ നന്ദപ്പന്‍ മാഷിന്‍റെ കീഴില്‍ മേക്കപ്പ് പഠിച്ച് അക്കാലത്ത് ക്ലാസിക്കല്‍ ഡാന്‍സിനും നാടകങ്ങള്‍ക്കും കലാകാരന്മാരെ ഇദ്ദേഹം അണിയിച്ചൊരുക്കി.
എട്ടു വര്‍ഷത്തിനു ശേഷം സ്വന്തമായി മേക്കപ്പ് ചെയ്തു തുടങ്ങി. സ്‌കൂള്‍ കലോത്സവങ്ങളില്‍ കലാതിലകമായി തിളങ്ങിയ നടിമാരായ മഞ്ജു വാര്യര്‍, ദിവ്യ ഉണ്ണി, വിദ്യാ ഉണ്ണി എന്നിവരെ മത്സരങ്ങള്‍ക്കായി അണിയിച്ചൊരുക്കിയതും ഇദ്ദേഹമാണ്.
സ്വന്തം ലേഖിക
