പത്തനംതിട്ട: തദ്ദേശ തെരഞ്ഞെടുപ്പിൽ മത്സരിക്കുന്നവരിൽ 52.36 ശതമാനം സ്ത്രീകൾ. ത്രിതല പഞ്ചായത്തുകളിലും നഗരസഭകളിലും കോർപറേഷനുകളിലുമായി 23,562 സീറ്റുകളിൽ മത്സരിക്കുന്ന 75,632 സ്ഥാനാർഥികളിൽ 39,604 പേർ സ്ത്രീകളാണ്. 36,027 പുരുഷൻമാരും ട്രാൻസ്ജെൻഡർ വിഭാഗത്തിലെ ഒരാളുമാണ് മത്സരരംഗത്തുള്ളത്.
1994ലെ പഞ്ചായത്ത് രാജ് നഗരപാലിക നിയമത്തിന്‍റെ തുടര്‍ച്ചയായി 2010 മുതല്‍ സംസ്ഥാനത്തു നടപ്പാക്കിയ നിയമത്തെത്തുടർന്നാണ് വനിതകളുടെ മുന്നേറ്റം തദ്ദേശസ്ഥാപനങ്ങളില്‍ കണ്ടുതുടങ്ങിയത്. 2020ലെ സ്ഥാനാർഥികളിൽ 51.53 ശതമാനം സ്ത്രീകളായിരുന്നു. 38,566 സ്ത്രീകളും 36,269 പുരുഷൻമാരും ഒരു ട്രാൻസ്ജെൻഡറുമാണ് ജനവിധി തേടിയത്.
ഇവരിൽ 12,017 സ്ത്രീകളും 9849 പുരുഷൻമാരും വിജയിച്ചു. ജില്ലാ പഞ്ചായത്തുകളിൽ 52.26 ശതമാനവും ബ്ലോക്ക് പഞ്ചായത്തുകളിൽ 54.37 ശതമാനവും ഗ്രാമപഞ്ചായത്തുകളിൽ 54.82 ശതമാനവും നഗരസഭകളിൽ 54.74 ശതമാനവും കോർപറേഷനുകളിൽ 54.34 ശതമാനവും വനിതാ ജനപ്രതിനിധികളുണ്ടായി.
1038 വനിതാ സ്ഥാനാർഥികൾ ഇത്തവണ കൂടിയിട്ടുണ്ട്. ജനറൽ സീറ്റുകളിൽപോലും വനിതകളെ പ്രമുഖ രാഷ്‌ട്രീയകക്ഷികളടക്കം സ്ഥാനാർഥികളാക്കിയിട്ടുണ്ട്. നിലവിലെ നിയമപ്രകാരം ആകെ വാർഡുകളുടെ എണ്ണം ഒറ്റയക്കം വന്നാൽ അധികംവരുന്ന സീറ്റ് വനിതകൾക്കുള്ളതാണ്. ഉദാഹരണത്തിന് 17 വാർഡുകളുള്ള തദ്ദേശ സ്ഥാപനത്തിൽ വനിതാ സംവരണം ഒന്പത് സീറ്റുകളിലായിരിക്കും.
ഡോക്ടർമാർ, അഭിഭാഷകർ, അധ്യാപകർ, വിദ്യാർഥിനികൾ, ആശാ, കുടുംബശ്രീ, ഹരിതകർമസേന പ്രവർത്തകർ തുടങ്ങി സമൂഹത്തിന്‍റെ വിവിധ തുറകളിൽപെട്ട വനിതകൾ മത്സരരംഗത്തുണ്ട്.
മത്സരഫലം വരുന്പോഴും വനിതകൾക്കായിരിക്കും തദ്ദേശ സ്ഥാപനങ്ങളിൽ ഭൂരിപക്ഷം. അധ്യക്ഷ, ഉപാധ്യക്ഷ പദവികളിലും സംവരണത്തിനപ്പുറത്തേക്ക് അവരുടെഎണ്ണം കടക്കും. വനിതാ സംവരണം 50 ശതമാനം ഉറപ്പാക്കിയ 2010ൽ 21,620 ജനപ്രതിനിധികളില്‍ 11,450 വനിതകളുണ്ടായിരുന്നു. വനിത സംവരണ വാര്‍ഡുകള്‍ കൂടാതെ ജനറല്‍ വാര്‍ഡുകളില്‍ നിന്നുപോലും വനിതകള്‍ തെരഞ്ഞെടുക്കപ്പെട്ടു വന്നു.
1994ലെ പഞ്ചായത്ത് രാജ് നഗരപാലിക നിയമപ്രകാരം തദ്ദേശസ്ഥാപനങ്ങളിലെ അംഗസംഖ്യയുടെയും അധ്യക്ഷ സ്ഥാനത്തിന്‍റെയും മൂന്നിലൊന്നില്‍ കുറയാത്ത എണ്ണം വനിതകള്‍ക്കു സംവരണം ചെയ്തിരുന്നു. 1995, 2000, 2005 വര്‍ഷങ്ങളില്‍ ഇതിന്‍റെ അടിസ്ഥാനത്തിലായിരുന്നു തെരഞ്ഞെടുപ്പ്. 2010ലെ തെരഞ്ഞെടുപ്പു മുതൽ പട്ടികജാതി-വര്‍ഗ വിഭാഗങ്ങള്‍ക്ക് ജനസംഖ്യാനുപാതികമായി സംവരണം ചെയ്തപ്പോള്‍ അതിന്‍റെ 50 ശതമാനവും ആ വിഭാഗങ്ങളിലെ വനിതകള്‍ക്കു ലഭിച്ചു.
ബിജു കുര്യൻ
