സൈസ് സീറോ എന്ന ചിത്രത്തിനുവേണ്ടി അനുഷ്ക തടിവച്ചതുമൂലം ബാഹുബലിയുടെ രണ്ടാം ഭാഗത്തിന്റെ ചിത്രീകരണം വൈകുന്നു. സ്ത്രീകളിലെ തടികൊണ്ടുണ്ടാകുന്ന ബുദ്ധിമുട്ടായിരുന്നു സൈസ് സീറോയുടെ പ്രമേയം. എന്നാല്‍ ഇതിനുശേഷം ജിമ്മിലും മറ്റും കഠിനമായ വര്‍ക്കൗട്ട് നടത്തിയിട്ടും ഉദ്ദേശിച്ചത്ര ശരീരഭാരം കുറയ്ക്കാന്‍ അനുഷ്കയ്ക്കു കഴിഞ്ഞില്ല. അതുകൊണ്ടുതന്നെ എത്രയും പെട്ടെന്ന് എന്തുവിലകൊടുത്തും ശരീരഭാരം കുറയ്ക്കാനാണു സംവിധായകന്‍ അനുഷ്കയോടു പറഞ്ഞിരിക്കുന്നത്. 2017 ഏപ്രിലില്‍ ബാഹുബലിയുടെ രണ്ടാം ഭാഗം എത്തുമെന്നു നേരത്തെ അണിയറപ്രവര്‍ത്തകര്‍ അറിയിച്ചിരുന്നു.
തിരക്കിട്ട ഷൂട്ടിംഗിലും അണിയറ പ്രവര്‍ത്തനത്തിലുമാണു ചിത്രത്തിന്റെ സംവിധായകന്‍ എസ്. എസ്. രാജമൗലിയും സംഘവും. അതിനിടെയാണ് രാജമൗലിക്കും സംഘത്തിനും അനുഷ്കയുടെ തടി പ്രശ് നമായിരിക്കുന്നത്. സൈസ് സീറോ എന്ന ചിത്രത്തിനു വേണ്ടി അനുഷ്ക 20 കിലോ ഭാരം കൂട്ടിയത് അന്നു വലിയ വാര്‍ത്തയായിരുന്നു. ആര്യ നായകനായ ചിത്രം തമിഴിലും തെലുങ്കിലുമായാണു പുറത്തിറങ്ങിയത്. തടി മൂലം സ്്ത്രീകള്‍ക്കുണ്ടാകുന്ന ബുദ്ധിമുട്ടുകളാണ് സിനിമയുടെ പ്രമേയം. കൂട്ടിയ തടി കുറയ്ക്കാനുള്ള പെടാപ്പാടിലാണ് അനുഷ്ക എന്നാണു റിപ്പോര്‍ട്ടുകള്‍.
തടി കൂട്ടാന്‍ വളരെ എളുപ്പമായിരുന്നു. എന്നാല്‍ അതു കുറയ്ക്കാന്‍ അത്ര എളുപ്പമല്ലെന്ന് താരത്തിന് ഇപ്പോഴാണത്രേ ബോധ്യമായത്. ബാഹുബലി 2-വില്‍ അഭിനയിക്കുന്നതിനു തടി കുറയ്ക്കുന്നതിനു വേണ്ടി അനുഷ്ക അമേരിക്കയ്ക്കു വരെ പോയി ചികിത്സ നടത്തിയെന്നും മുമ്പു റിപ്പോര്‍ട്ടുകള്‍ വന്നിരുന്നു. എന്നിട്ടും ഫലം കണ്ടില്ല എന്നാണു പുതിയ റിപ്പോര്‍ട്ടുകള്‍ വ്യക്തമാക്കുന്നത്. ഇപ്പോള്‍ ചിത്രം തിയറ്ററുകളില്‍ എത്തിക്കുന്നതിനു പ്രധാന വെല്ലുവിളിയായി നടിയുടെ തടി മാറിയെന്നാണു റിപ്പോര്‍ട്ടുകള്‍ വ്യക്തമാക്കുന്നത്.
