പാലക്കാട്: പ്രായപൂര്‍ത്തിയാവാത്ത പെണ്‍കുട്ടിയെ വിവാഹവാഗ്ദാനം നല്‍കി പീഡിപ്പിച്ച് ദൃശ്യങ്ങള്‍ മൊബൈലില്‍ പകര്‍ത്തി സോഷ്യല്‍മീഡിയ വഴി പ്രചരിപ്പിച്ച കേസില്‍ ഒരാള്‍ അറസ്റ്റില്‍. മങ്കര ഞാറക്കോട് ഫൈസലിനെ (21) യാണ് ടൗണ്‍ നോര്‍ത്ത് പോലീസ് അറസ്റ്റ് ചെയ്തത്. കഴിഞ്ഞ വര്‍ഷം ഫെബ്രുവരിയില്‍ പ്രതി പെണ്‍കുട്ടിയെ മങ്കര ഞാറക്കോടുള്ള വീട്ടില്‍ കൊണ്ട് പോയി ലൈംഗികമായി ബന്ധപ്പെടുകയും അത് മൊബൈല്‍ ഫോണില്‍പകര്‍ത്തുകയും ചെയ്തു. തുടര്‍ന്ന് സുഹൃത്തുക്കള്‍ക്കും മറ്റും സോഷ്യല്‍മീഡിയ വഴി വിഡീയോദൃശ്യങ്ങള്‍ പ്രചരിപ്പിക്കുകയായിരുന്നു.
പെണ്‍കുട്ടിയുടെ വീട്ടുകാര്‍ നല്‍കിയ പരാതിയില്‍ മേല്‍ നോര്‍ത്ത് പോലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചതറിഞ്ഞ് പ്രതി ഒളിവില്‍ പോകുകയായിരുന്നു. പത്തനംതിട്ട, കോട്ടയം, ആലപ്പുഴ എന്നിവിടങ്ങളില്‍ പ്രതി ഒളിവില്‍ കഴിയുകയായിരുന്നു. മൊബൈല്‍ നമ്പറുകള്‍ അടിക്കടി മാറ്റി പോലീസിനെ കുഴക്കിയിരുന്നു. കഴിഞ്ഞ ദിവസം പ്രതി വീട്ടിലെത്തിയെന്ന രഹസ്യവിവരത്തിന്റെ അടിസ്ഥാനത്തിലാണ് പോലീസ് സംഘം സ്ഥലത്തെത്തി അറസ്റ്റ് ചെയ്തത്.
പ്രതിയെ ഇന്ന് കോടതിയില്‍ ഹാജരാക്കും. ടൗണ്‍ നോര്‍ത്ത് സിഐ ജോഷി ജോസ്, സൗത്ത് സിഐ ആര്‍ മനോജ്കുമാര്‍, എസ് ഐ ടി സി മുരുകന്‍, എഎസ്‌ഐ മാരായ ജി ഷേണു, കെ.കെ ലക്ഷ്മണന്‍, ക്രൈം സക്വാഡ് അംഗങ്ങളായ കെ നന്ദകുമാര്‍, ആര്‍. കിഷോര്‍, കെ. അഹമ്മദ്കബീര്‍, ആര്‍. വിനീഷ്, ആര്‍. രാജീവ് എന്നിവരടങ്ങുന്ന സംഘമാണ് കേസന്വേഷണം നടത്തി പ്രതിയെ അറസ്റ്റ് ചെയ്തത്. പ്രതിയുടെ പക്കല്‍നിന്നും ദൃശ്യങ്ങള്‍ റെക്കാര്‍ഡ് ചെയ്യാനുപയോഗിച്ച മൊബൈല്‍ ഫോണ്‍ പോലീസ് കസ്റ്റഡിയിലെടുത്തു. നിരവധി മെമ്മറി കാര്‍ഡുകളും പിടിച്ചെടുത്തിട്ടുണ്ട.്‌
