കൊച്ചി: സംസ്ഥാനത്തെ എല്ലാ പെട്രോള്‍ പമ്പുകളും വെള്ളിയാഴ്ച അടച്ചിടും. ഓള്‍ കേരള ഫെഡറേഷന്‍ ഓഫ് പെട്രോളിയം ട്രേഡേഴ്‌സിന്റേയും കേരള സ്റ്റേറ്റ് പെട്രോളിയം ട്രേഡേഴ്‌സ് അസോസിയേഷന്റേയും ആഭിമുഖ്യത്തില്‍ സംസ്ഥാന വ്യാപകമായി വെള്ളിയാഴ്ച രാവിലെ ആറു മുതല്‍ വൈകിട്ട് ആറു വരെയാണ് പമ്പുകള്‍ അടച്ചിടുക. ചെങ്ങന്നൂരില്‍ പെട്രോള്‍ പമ്പ് ഉടമയെ ആക്രമിച്ച് കൊലപ്പെടുത്തിയതില്‍ പ്രതിഷേധിച്ചാണ് പമ്പുകള്‍ അടച്ചിടുന്നതെന്നു സംഘടനാ നേതാക്കള്‍ അറിയിച്ചു. ഇന്നു പമ്പുകളില്‍ കരിദിനം ആചരിക്കും. വൈകിട്ട് നാലിനു ചെങ്ങന്നൂരില്‍ നടക്കുന്ന അടിയന്തര സംസ്ഥാന എക്‌സിക്യൂട്ടീവ് യോഗത്തില്‍ തുടര്‍ നടപടികള്‍ സ്വീകരിക്കുമെന്നും നേതാക്കള്‍ അറിയിച്ചു.
ആക്രമണത്തില്‍ പരുക്കേറ്റ് ആശുപത്രിയില്‍ ചികില്‍സയിലായിരുന്ന പെട്രോള്‍ പമ്പുടമ ചെങ്ങന്നൂര്‍ മുളക്കുഴ രേണു ഓട്ടോ ഫ്യൂവല്‍സ് ഉടമ ശങ്കരമംഗലം മുരളീധരന്‍ നായര്‍ (55) ഇന്നു പുലര്‍ച്ചെയാണ് മരിച്ചത്. കഴിഞ്ഞ 18 നു പമ്പിലെത്തിയ രണ്ടംഗ സംഘവുമായി പെട്രോള്‍ നിറയ്ക്കുന്നതു സംബന്ധിച്ചു തര്‍ക്കമുണ്ടായിരുന്നു. പെട്രോള്‍ നിറയ്ക്കാന്‍ വൈകി എന്നതായിരുന്നു തര്‍ക്കത്തിനു കാരണം. പമ്പില്‍ നിന്നു പോയശേഷം ഇവര്‍ മടങ്ങിയെത്തി ആക്രമിക്കുകയായിരുന്നു. സംഭവത്തില്‍ ഒരാളെ പൊലീസ് അറസ്റ്റു ചെയ്തിരുന്നു.
