പത്തനംതിട്ട: പ്രതികളുടെ റിമാന്ഡ് റിപ്പോര്ട്ട് അഭിഭാഷകനു ചോര്ത്തി നല്കിയ ഗ്രേഡ് എസ്ഐക്ക് സസ്പെന്ഷന്. തിരുവല്ല സ്റ്റേഷനിലെ മുന് ഗ്രേഡ് എസ്ഐ എസ്. എല്. ബിനുകുമാറിനെയാണ് ഡിഐജി ജെ. അജിതാ ബീഗം സസ്പെന്ഡ് ചെയ്തത്.
തിരുവല്ല ബാറില് വച്ച് കാലില് ചവിട്ടിയെന്നാരോപിച്ച് യുവാവിനെ ആക്രമിച്ച് മൃതപ്രായനാക്കിയ കേസിലെ പ്രതികളായ കാപ്പകേസ് പ്രതി രാഹുല് മനോജ്, കിരണ് തോമസ് എന്നിവരെ കോടതിയില് ഹാജരാക്കുന്നതിന് മുന്പ് ബിനുകുമാര് റിമാന്ഡ് റിപ്പോര്ട്ട് പകര്പ്പ് പ്രതികള്ക്ക് വേണ്ടി ഹാജരാകുന്ന യുവ അഭിഭാഷകനു ചോര്ത്തി നല്കിയിരുന്നുവെന്ന് അന്വേഷണത്തില് വ്യക്തമായതിനേ തുടര്ന്നാണ് നടപടിയെന്നു നടപടി റിപ്പോര്ട്ടില് പറയുന്നു.
കഴിഞ്ഞ നവംബര് 24 നാണ് പ്രതികളെ ബിനുകുമാറിന്റെ നേതൃത്വത്തില് തിരുവല്ല ജുഡീഷല് ഒന്നാം ക്ലാസ് മജിസ്ട്രേറ്റ് കോടതിയില് ഹാജരാക്കിയത്. ഇവരെ 14 ദിവസത്തേക്ക് റിമാന്ഡ് ചെയ്തു. തുടര്ന്ന് കോടതിയില് ഹാജരാക്കിയ റിമാന്ഡ് റിപ്പോര്ട്ടില് പ്രതികള്ക്കുള്ള പകര്പ്പില്ല എന്ന് അവിടെ നിന്ന് തിരുവല്ല സ്റ്റേഷനിലേക്ക് അറിയിച്ചു.
എസ്എച്ച്ഒ നടത്തിയ അന്വേഷണത്തില് പ്രതികള്ക്കുള്ള റിമാന്ഡ് റിപ്പോര്ട്ടിന്റെ പകര്പ്പ് കോടതിയില് നല്കുന്നതിന് എസ്ഐ ബിനുകമാറിനെ ഏല്പിച്ചിരുന്നതായും എന്നാല്, പ്രതികളെ കോടതിയില് ഹാജരാക്കുന്നതിനു മുന്പ് പ്രതിഭാഗം അഭിഭാഷകന് ബിനുകുമാര് ഇതു നല്കിയെന്നും കണ്ടെത്തി.
മുന്പ് മൂന്നു തവണയായി ഇതേ അഭിഭാഷകനില് നിന്ന് എസ്ഐ ബിനുകുമാര് 30,000 രൂപ കൈപ്പറ്റിയിരുന്നുവെന്നും തെളിഞ്ഞു. തിരുവല്ല ഡിവൈഎസ്പിയുടെ അന്വേഷണ റിപ്പോര്ട്ടിന്റെ അടിസ്ഥാനത്തില് ബിനുകുമാറിനെ ജില്ലാ പോലീസ് ആസ്ഥാനത്തേക്ക് സ്ഥലം മാറ്റിയിരുന്നു.
തുടര്ന്ന് അന്വേഷണം നടത്തിയ സ്പെഷല് ബ്രാഞ്ച് ഡിവൈഎസ്പിയുടെ റിപ്പോര്ട്ടിന്റെ കൂടി അടിസ്ഥാനത്തിലാണ് ഇപ്പോള് സസ്പെന്ഡ് ചെയ്തിരിക്കുന്നത്. വകുപ്പുതല തുടരന്വേഷണം നടത്തുന്നതിന് കോന്നി ഡിവൈഎസ്പിയെ ചുമതലപ്പെടുത്തി.
