അങ്ങ് ജപ്പാനിലാണ് സംഭവം. രണ്ട് മക്കളുടെ അച്ഛനായ 61 വയസുകാരന്‍ സേഞ്ചി നകാജിമയാണ് ഭാര്യയെ ഉപേക്ഷിച്ച ശേഷം സുപ്രധാനമായ ആ തീരുമാനമെടുത്തത്. ഇനിയൊരു തലവേദന ഉണ്ടാക്കാനായി മറ്റൊരാളെ ജീവിതത്തിലേക്ക് കൊണ്ടുവരുന്നില്ല. പകരം മാര്‍ക്കറ്റില്‍ പോയി ഒരു സെക്‌സ് ഡോള്‍ (പാവ) വാങ്ങി തന്റെ ജീവിത പങ്കാളിയായി പ്രഖ്യാപിച്ചു. ആധുനിക കാലത്തെ ഹൃദയമില്ലാത്ത മാനുഷിക ബന്ധങ്ങളില്‍ ഇനി താത്പര്യമില്ലെന്നും പുതിയ ഭാര്യ എന്തായാലും തന്റെ വഞ്ചിക്കില്ലെന്നുമാണ് ഇദ്ദേഹത്തിന്റെ അഭിപ്രായം.
ഭാര്യയുമായി എന്നും വഴക്കു പതിവായതിനെത്തുടര്‍ന്നാണ് ഇയാള്‍ ബന്ധം ഉപേക്ഷിച്ചത്. അതിനുശേഷമാണ് ഈ പാവ ഭാര്യയെ വധുവായി സ്വീകരിച്ചത്. ഇവള്‍ വന്നതോടെ തന്റെ ജീവിതം അര്‍ത്ഥപൂര്‍ണ്ണമായി മാറിയെന്നും സേഞ്ചി പറയുന്നു. കിടപ്പും നടപ്പും എല്ലം രണ്ടുപേരും ഒന്നിച്ചു തന്നെ.
ഉറക്കമുണരുമ്പോള്‍ മുതല്‍ രണ്ടുപേരും ദമ്പതികളെ പോലെയാണ്. രാവിലെ നടക്കാനിറങ്ങുമ്പോഴും ഷോപ്പിങിന് പോകുമ്പോഴും സേഞ്ചി ഒരു വീല്‍ ചെയറില്‍ പാവയെയും കൂട്ടും. കൊച്ചു വര്‍ത്തമാനമൊക്കെ പറഞ്ഞാണ് നടത്തം. നാട്ടുകാര്‍ നോക്കി നിന്ന് ചിരിക്കുമെങ്കിലും അദ്ദേഹത്തിന് അതില്‍ പ്രശ്‌നമൊന്നും ഇതുവരെ തോന്നിയിട്ടില്ല. വിവിധ തരം വസ്ത്രങ്ങളും ആഭരണങ്ങളുമൊക്കെ അദ്ദേഹം വാങ്ങി പാവയെ ധരിപ്പിക്കും. ഒരുമിച്ചിരുന്ന് ടിവി കാണുന്നതാണ് അദ്ദേഹത്തിന് ഏറ്റവും ഇഷ്ടം. 4000 ഡോളര്‍ മുടക്കിയാണ് സേഞ്ചി നകാജിമ പാവയെ സ്വന്തമാക്കിയത്.
പാവ ഭാര്യയുടെ വാര്‍ത്ത പരന്നതോടെ ഈ അപൂര്‍വ്വ ദമ്പതികളെ കാണാനായി ദൂരെനിന്നു പോലും ആളുകള്‍ എത്തുന്നുണ്ട്. ഒപ്പം നിന്നു സെല്‍ഫിയുമെടുത്താണ് സേഞ്ചി സന്ദര്‍ശകരെ പറഞ്ഞയയ്ക്കുന്നത്.
