കൊച്ചി: കൊല്ലം പരവൂരിലെ വെടിക്കെട്ട് ദുരന്തത്തിന്റെ പശ്ചാത്തലത്തില്‍ സംസ്ഥാനത്ത് അപകടകരമായ വെടിക്കെട്ട് നിരോധിക്കുന്നതുമായി ബന്ധപ്പെട്ടു ഹൈക്കോടതി ജഡ്ജി ജസ്റ്റീസ് വി.ചിദംബരേഷ് രജിസ്ട്രാര്‍ക്കു നല്‍കിയ കത്ത് ഡിവിഷന്‍ ബെഞ്ച് പൊതുതാത്പര്യ ഹര്‍ജിയായി ഇന്നു പരിഗണിക്കും.
സംസ്ഥാനത്തെ വെടിക്കെട്ടപകടങ്ങളില്‍ കൂടുതല്‍ ദുരന്തം വിതയ്ക്കുന്ന കതിന, അമിട്ട്, ഗുണ്ട് എന്നിവ നിരോധിക്കുന്നതിനു നടപടി സ്വീകരിക്കണമെന്നും പ്രഹരശേഷി കുറഞ്ഞ ചൈനീസ് പടക്കങ്ങള്‍ ഉള്‍പ്പെടെ ഉപയോഗിക്കാന്‍ നടപടി സ്വീകരിക്കണമെന്നും കത്തില്‍ ആവശ്യപ്പെട്ടിട്ടുണ്ട്.
പരവൂര്‍ പുറ്റിംഗലില്‍ ഉണ്ടായത് ഒറ്റപ്പെട്ട സംഭവമല്ലെന്നും സംസ്ഥാനത്തു നിരവധി വെടിക്കെട്ട് അപകടങ്ങള്‍ ഉണ്ടാകുന്നുണ്ടെന്നും കത്ത് ചൂണ്ടിക്കാട്ടുന്നു. എക്‌സ്‌പ്ലോസീവ് ആക്ട്, സ്റ്റാന്‍ഡേര്‍ഡ് ഓപ്പറേറ്റിംഗ് പ്രൊസീജിയര്‍ തുടങ്ങിയവയുമായി ബന്ധപ്പെട്ട നിയമങ്ങള്‍ നിലനില്‍ക്കുന്നുണ്ടെങ്കിലും അവ പലപ്പോഴും ദുരുപയോഗം ചെയ്യപ്പെടുകയാണ്. ജീവിതം എന്നത് ഏറ്റവും അമൂല്യമാണ്. അതിനു പകരമാവില്ല പണം. ജീവിക്കാനുള്ള അവകാശം ഭരണഘടന ഉറപ്പു നല്‍കിയിട്ടുണ്ട്. മതാചാര പ്രകാരമുള്ളതായിട്ടുകൂടി ജെല്ലിക്കെട്ട് നിരോധിച്ചു സുപ്രീംകോടതി ഉത്തരവ് നല്‍കിയിരുന്നു.
ഈ സാഹചര്യത്തില്‍ അന്തരീക്ഷ മലനീകരണവും ശബദ്മലനീകരണവും സൃഷ്ടിക്കുന്ന വെടിക്കെട്ട് നിരോധിക്കുന്നതില്‍ എന്തു തടസമാണുള്ളത്. മതാചരങ്ങള്‍ പിന്തുടരുന്നതിനും പ്രചരിപ്പിക്കുന്നതിനും പ്രഖ്യാപിക്കുന്നതിനുമുള്ള സ്വാതന്ത്ര്യമെന്നതു വെടിക്കെട്ട് നടത്തുന്നതിനുള്ള സ്വാതന്ത്ര്യമല്ല. ബറിയം നൈട്രേറ്റ്, പൊട്ടാസ്യം നൈട്രേറ്റ്, സള്‍ഫര്‍, അലുമിനിയം പൗഡര്‍ എന്നിവയ്ക്കു പുറമേ മാരക പ്രഹരശേഷിയുളളതും നിരോധിക്കപ്പെട്ടതുമായ പൊട്ടാസ്യം ക്ലോറൈഡ് കൂടി വെടിക്കെട്ടിന് ഉപയോഗിക്കുന്നു. പാലക്കാട് ജില്ലയിലാണു വെടിക്കെട്ട് അപകടങ്ങള്‍ ഏറെയും.
ഇത്തരം അനുചിതമായ പ്രവര്‍ത്തനങ്ങളിലൂടെ മനുഷ്യനിര്‍മിത ദുരന്തങ്ങള്‍ ഉണ്ടാകുമ്പോള്‍ തനിക്ക് ഇതിനെതിരേ കണ്ണടയ്ക്കാനാവില്ലെന്നു കത്തില്‍ ജസ്റ്റീസ് വി.ചിദംബരേഷ് പറയുന്നു. സ്‌ഫോടക വസ്തുക്കള്‍ ഉപയോഗിച്ചുള്ള ഇത്തരം ദുരന്തങ്ങള്‍ തടയുന്നതിനു ജുഡീഷറി ഇടപെടേണ്ട സമയം അതിക്രമിച്ചിരിക്കുന്നു. പ്രഹരശേഷി കുറഞ്ഞ വെടിക്കെട്ട് നടത്തുന്നതിനുള്ള സാധ്യത പരിഗണിക്കണമെന്നും കത്തില്‍ പറയുന്നു. കത്ത് പൊതുതാത്പര്യ ഹര്‍ജിയായി പരിഗണിക്കുന്നതിനായി ഡിവിഷന്‍ ബെഞ്ചിനു കൈമാറണമെന്നും കത്തില്‍ ആവശ്യപ്പെട്ടിരുന്നു. ഈ സാഹചര്യത്തിലാണ് ജസ്റ്റീസ് തോട്ടത്തില്‍ ബി.രാധാകൃഷ്ണന്‍ അധ്യക്ഷനായ ഡിവിഷന്‍ ബെഞ്ച് കത്ത് പൊതുതാത്പര്യ ഹര്‍ജിയായി ഇന്നുച്ചയ്ക്കു പരിഗണിക്കാന്‍ പ്രത്യേക സിറ്റിംഗ് നടത്തുന്നത്.
