പുലിമുരുകന്‍ വിജയക്കുതിപ്പ് തുടരുമ്പോഴും സംവിധായകന്‍ വൈശാഖ് സങ്കടത്തിലാണ്. സിനിമയിലെ ആക്ഷന്‍ രംഗങ്ങള്‍ ഉള്‍പ്പെടെയുള്ള പ്രധാനപ്പെട്ട പല രംഗങ്ങളും വാട്ട്‌സാപ്പിലൂടെ പ്രചരിക്കുന്നതാണ് വൈശാഖിനെ വേദനിപ്പിക്കുന്നത്. ഒരുപാട് കഷ്ടപ്പെട്ടും വേദനകള്‍ സഹിച്ചുമാണ് സിനിമ പൂര്‍ണതയിലെ ത്തിച്ചതെന്ന് അദ്ദേഹം പറയുന്നു. തന്റെ വേദനകള്‍ ഫേസ്ബുക്ക് പോസ്റ്റിലൂടെയാണ് അദ്ദേഹം പങ്കുവച്ചത്.
“പ്രിയരേ,ഇത് ഏറെ വേദനിപ്പിക്കുന്നു’..എന്നു പറഞ്ഞാണ് അദ്ദേഹം പോസ്റ്റ് തുടങ്ങുന്നത്.
“”കാടും മലയും താണ്ടി കിലോമീറ്ററുകളോളം നടന്നുപോയാണ് ഓരോ ദിവസത്തേയും ഷൂട്ടിങ്ങ് പൂര്‍ത്തീകരിച്ചിരുന്നത്. എല്ലാവരും അവരാല്‍ കഴിയുന്നതെല്ലാം തോളിലേറ്റിയാണ് ആ ദൂരങ്ങളെല്ലാം താണ്ടിയത്.
എല്ലാവര്‍ക്കും ഉള്ളില്‍ ‘പുലിമുരുകന്‍’ എന്ന സ്വപ്നം യാഥാര്‍ഥ്യമാകുന്ന ദിനം മാത്രമേ ഉണ്ടായിരുന്നുള്ളൂ.. അത്രയധികം പേരുടെ കഠിനാദ്ധ്വാനം ഒരു സിനിമയായി തിയറ്ററുകളില്‍ നിറഞ്ഞോടുമ്പോള്‍ അതിലെ പ്രസക്തഭാഗങ്ങള്‍ മൊബൈലില്‍ ഷൂട്ട് ചെയ്ത് സോഷ്യല്‍ മീഡിയ വഴി ഷെയര്‍ ചെയ്യുന്നത് തികച്ചും വേദനാജനകമായ പ്രവൃത്തിയാണ്. നിങ്ങളുടെ ആവേശം മനസ്സിലാക്കാവുന്നതാണ്.
പക്ഷേ ഓരോ രംഗത്തിനും വേണ്ടി ഒട്ടനവധി പേര്‍ ഒഴുക്കിയ വിയര്‍പ്പുതുള്ളികള്‍ ഏറെയാണ്. ദയവായി അത്തരം ക്ലിപ്പിംഗ്‌സ് ഷെയര്‍ ചെയ്യാതിരിക്കുക. ചിത്രം പൂര്‍ണമായി തിയറ്ററില്‍ ഇരുന്നു തന്നെ ആസ്വദിക്കുക.ഇതൊരു അപേക്ഷയായി കണ്ട് എല്ലാവരും ദയവായി സഹകരിക്കുക.”- വൈശാഖ് പറയുന്നു.
