ഏഥന്‍സ്: തുര്‍ക്കി വഴി ഗ്രീസിലെത്തുന്ന അഭയാര്‍ഥികളെ തുര്‍ക്കിയിലേക്കു തന്നെ തിരിച്ചയയ്ക്കാന്‍ അനുവദിക്കുന്ന നിയമം ഗ്രീക്ക് പാര്‍ലമെന്റ് പാസാക്കി. അഭയാര്‍ഥികളെ തുര്‍ക്കിയില്‍ തന്നെ പുരധിവസിപ്പിക്കാനുള്ള യൂറോപ്യന്‍ യൂണിയന്‍ പാക്കേജിന്റെ ചുവടു പിടിച്ചാണ് നിയമ നിര്‍മാണം.
തിങ്കളാഴ്ച മുതല്‍ ഗ്രീസില്‍നിന്നു തിരിച്ചയയ്ക്കുന്ന അഭയാര്‍ഥികള്‍ തുര്‍ക്കിയില്‍ എത്തിത്തുടങ്ങുമെന്നാണ് കരുതുന്നത്. എന്നാല്‍, ഇരു രാജ്യങ്ങളും ഈ പദ്ധതി നടപ്പാക്കാന്‍ ഫലപ്രദമായ മുന്നൊരുക്കങ്ങള്‍ സ്വീകരിച്ചിട്ടില്ലെന്ന ആശങ്ക ശക്തമാണ്.
ഗ്രീക്ക് പാര്‍ലമെന്റില്‍ അവതരിപ്പിച്ച നിയമ നിര്‍ദേശത്തെ 169 പേരാണ് അനുകൂലിച്ചത്. 300 അംഗങ്ങളാണു പാര്‍ലമെന്റില്‍.
കഴിഞ്ഞ വര്‍ഷം മാത്രം തുര്‍ക്കി വഴി ഗ്രീസിലേക്കു വന്നത് പത്തു ലക്ഷത്തിലേറെ അഭയാര്‍ഥികളാണ്. ഇവിടെനിന്ന് സമ്പന്ന യൂറോപ്യന്‍ രാജ്യങ്ങളിലേക്കു പോകുകയാണ് അഭയാര്‍ഥികള്‍ ചെയ്തുവന്നത്. എന്നാല്‍, ബാള്‍ക്കന്‍ രാജ്യങ്ങളും മറ്റും അതിര്‍ത്തി അടച്ചതോടെ ഇവരിപ്പോള്‍ ഗ്രീസില്‍ തന്നെ കുടുങ്ങിക്കിടക്കുകയാണ്.
റിപ്പോര്‍ട്ട്: ജോസ് കുമ്പിളുവേലില്‍
