എ.എഫ്.ഷാഹിന
അറബി മലയാള ചരിത്രത്തിന്റെ പൊരുള്‍ തേടിയിറങ്ങുന്നവര്‍ക്കുള്ള കേരളത്തിലെ ഏക വഴികാട്ടി മഹാകവി മോയിന്‍കുട്ടി വൈദ്യര്‍ അക്കാദമിയിലെ അറബി മലയാള റിസര്‍ച്ച് ആന്‍ഡ് ലൈബ്രറി. മലയാള സാഹിത്യ ശാഖയില്‍ ആരാലും അറിയപ്പെടാതെ കിടന്ന അറബി മലയാള സാഹിത്യ മണ്ഡലത്തെ പുതുതലമുറക്കും ഗവേഷണ വിദ്യാര്‍ഥികള്‍ക്കുള്ള കൃതികളിലൂടെ തന്നെ പരിചയപ്പെടുത്തുകയാണ് ലൈബ്രറി പ്രവര്‍ത്തനത്തിലൂടെ വൈദ്യര്‍ സ്മാകരക കമ്മിറ്റി. ഒരു കാലഘട്ടത്തില്‍ നിരവധി സര്‍ഗധനന്‍മാര്‍ക്ക് ജന്മം നല്‍കിയ അറബി മലയാള സാഹിത്യ ശാഖയില്‍ ആറായിരത്തിലേറെ പദ്യ, ഗദ്യങ്ങളാണ് പിറന്നിട്ടുളളത്.
ഇവ നാലു വര്‍ഷത്തെ അന്വേഷണത്തില്‍ നിന്ന് ഒരു പരിധിവരെ കണ്ടെത്തിയാണ് ഇന്ത്യയിലെ തന്നെ ആദ്യ അറബിക് മലയാള റിസര്‍ച്ച് ലൈബ്രറി വൈദ്യര്‍സ്മാരകത്തിലൊരുക്കിയിരിക്കുന്നത്. കാലിക്കട്ട് യൂണിവേഴ്‌സിറ്റിയിടെ റിസര്‍ച്ച് ലൈബ്രറി കൂടിയാണിത്. ഡോ.എം.എന്‍ കാരശ്ശേരി ചെയര്‍മാനും ഡോ.കെ.കെ. അബ്ദുള്‍ സത്താര്‍ കണ്‍വീനറുമായ ലൈബ്രറി കമ്മിറ്റിയാണ് ഇപ്പോഴും പഴയകാല ഗ്രന്ഥങ്ങള്‍ ശേഖരിച്ചു വരുന്നത്.
കണ്ടെത്തിയവയില്‍ ഏറ്റവും പഴക്കമുള്ള കോഴിക്കോട് ഖാളി മുഹമ്മദ് രചിച്ച മുഹിയുദ്ദീന്‍ മാല മുതല്‍ മഹാകവി മോയിന്‍കുട്ടി വൈദ്യരുടെ യഥാര്‍ത്ഥ കൈപ്പട വരെയുള്ള അപൂര്‍വ കൃതികള്‍ ലൈബ്രറിയില്‍ സൂക്ഷിച്ചിട്ടുണ്ടെന്ന് ഡോ.മുഹമ്മദ് അബ്ദുള്‍ സത്താര്‍ പറഞ്ഞു. 22 ശാഖകളില്‍ പെട്ട 1350 അപൂര്‍വ അറബി മലയാള ഗ്രന്ഥങ്ങള്‍ ലൈബ്രറിയില്‍ ശേഖരിക്കാനായിട്ടുണ്ട്. ലക്ഷദ്വീപ്, കാസര്‍കോട്, കണ്ണൂര്‍, തിരുവനന്തപുരം, മലബാറിന്റെ വിവിധ പ്രദേശങ്ങള്‍ എന്നിവിടങ്ങളില്‍ നിന്നാണ് കൂടുതല്‍ പുസ്തകവും ശേഖരിച്ചിട്ടുള്ളത്. ചരിത്രകാരന്‍ കെ.കെ.മുഹമ്മദ് അബ്ദുള്‍ കരീം, സി.എന്‍.
അഹമ്മദ് മൗലവി എന്നിവര്‍ ചേര്‍ന്നെഴുതിയ മഹത്തായ മാപ്പിള സാഹിത്യ പാരമ്പര്യം എന്ന കൃതി മുന്‍നിര്‍ത്തിയാണ് ലൈബ്രറിയിലേക്ക് അറബി മലയാള കൃതികള്‍ തേടിയിറങ്ങിയത്. ഇതിന് ചുവടുപിടിച്ച് കേരളത്തില്‍ നിലവിലുള്ള മാപ്പിള സാഹിത്യ ശാഖയെ സമ്പുഷ്ടമാക്കുന്ന ബാലകൃഷ്ണന്‍ വള്ളിക്കുന്ന് അടക്കമുള്ളവരുടെ നിര്‍ദേശങ്ങളും തേടി.വേങ്ങര കുഞ്ഞിപ്പലാക്കല്‍ മുഹമ്മദ്ഹാജിയുടെ എടത്വാ ഭവനത്തില്‍ നിന്ന് ഒട്ടനവധി അപൂര്‍വ്വ ഗ്രന്ഥങ്ങളാണ് കണ്ടെത്താനായത്. കാലങ്ങളായി അപൂര്‍വ ഗ്രന്ഥങ്ങള്‍ ശേഖരിച്ചു വരുന്ന ഭവനമാണിത്. കെ.കെ.മുഹമ്മദ് അബ്ദുള്‍ കരീമിന്റെ നിരവധി ഗ്രന്ഥങ്ങളും ലൈബ്രറിക്ക് മുതല്‍ക്കൂട്ടായിട്ടുണ്ട്.
മാലപ്പാട്ട്, ഖിസ്വപാട്ട്, ചരിത്രങ്ങള്‍, ഇസ്‌ലാമിക കര്‍മശാസ്ത്രം, ഖുര്‍ആന്‍ പരിഭാഷകള്‍, ഭാഷാ ശാസ്ത്രം, നോവല്‍ തുടങ്ങി വിവിധ മേഖലയായാണ് ലൈബ്രറി തരം തിരിച്ചിരിക്കുന്നത്. അപൂര്‍വ ചികിത്സാ ഗ്രന്ഥങ്ങളുടെ ഒരു വിഭാഗം തന്നെ ലൈബ്രറിക്ക് മുതല്‍കൂട്ടായുണ്ട്. കൊങ്ങണം വീട്ടില്‍ അഹമ്മദ് മുസ്‌ലിയാര്‍ രചിച്ച ഹിന്ദുസ്ഥാനി ഭാഷാ പഠനം,സൈനുദ്ദീന്‍ ഇബ്‌നു, സിദ്ദിഖ് മഖ്ദൂം രചിച്ച സുറിയാനി ഭാഷാ പഠനം, അറബി- ഹിന്ദുസ്ഥാനി-ഇംഗ്ലീഷ്-തമിഴ് അക്ക പഠന സഹായി, ഭാഷാ പര്യായ പുസ്തകം, വിവിധ ശബ്ദതാരാവലികള്‍, മോയിന്‍കുട്ടി വൈദ്യര്‍, കുഞ്ഞായിന്‍ മുസ്‌ലിയാര്‍, ചാക്കീരി, ടി.ഉബൈദ് അടക്കമുള്ള മാപ്പിളപ്പാട്ടുകളും പഴമക്കാര്‍ക്ക് ലൈബ്രറിയില്‍ കണ്ടെത്താനാകും.
പലരുടെയും കൈയെഴുത്തു പ്രതി തന്നെ കണ്ടെത്താനാണ് ലൈബ്രറി ശ്രമിച്ചിട്ടുള്ളത്. ഇവ ലഭിക്കാത്തവയാണ് പതിപ്പുകള്‍ സൂക്ഷിച്ചിട്ടുള്ളത്. ചരിത്ര വിദ്യാര്‍ഥികള്‍ക്കു പുറമേ വിദേശികള്‍ വരെ ലൈബ്രറിയില്‍ നിത്യസന്ദര്‍ശകരാണിപ്പോള്‍.അറബി അക്ഷരമാലയിലെ 28 അക്ഷരങ്ങള്‍, മലയാള അക്ഷരമാലയിലേക്ക് മാറ്റി തയാറാക്കിയതാണ് അറബി മലയാളം. അറബികള്‍, ഇസ്‌ലാംമത പ്രചരണവുമായി കേരളത്തിലെത്തിയപ്പോള്‍ മതപ്രചരണത്തിനായാണ് അറബി മലയാളം ഉപയോഗിച്ചതെന്നാണ് പറയപ്പെടുന്നത്. ആയതിനാല്‍ തന്നെ ഇസ്‌ലാമിക പ്രബോധനങ്ങളും സാഹിത്യങ്ങളും നിരവധി അറബി മലയാളത്തിലാണ് രചിക്കപ്പെട്ടിട്ടുള്ളത്.അറബി മലയാളം ഇന്ന് ചില സുന്നി മദ്രസകളില്‍ മാത്രമാണ് ഉപയോഗിക്കുന്നത്.
പദ്യ, ഗദ്യവിഭാഗങ്ങളായിട്ടാണ് ഗ്രന്ഥങ്ങളധികവും രചിക്കപ്പെട്ടിട്ടുള്ളത്. ഇതില്‍ ഗദ്യങ്ങള്‍ കൂടുതലും പഴയ പണ്ഡിതന്‍മാരുടെ ഫത്‌വകളായായിട്ടാണ് കാണപ്പെടുന്നത്. കൈയെഴുത്തു രൂപത്തിലാണ് ഫത്‌വകള്‍ ആദ്യകാലത്ത് പ്രചരിച്ചിരുന്നത്. നമസ്കാര സമയങ്ങളടക്കം കേരളീയ രീതിയില്‍ പദ്യത്തില്‍ ലഭിക്കപ്പെട്ടതായി കാണുന്നുണ്ട്. ഇത്തരത്തിലുള്ള അപൂര്‍വ ഗ്രന്ഥങ്ങള്‍ ഇപ്പോഴും തേടിയുളള യാത്രയിലാണെന്ന് ഡോ.കെ.കെ.മുഹമ്മദ് അബ്ദുള്‍ സത്താര്‍ പറഞ്ഞു.
