കോട്ടയം: ജില്ലാ ഭരണകൂടത്തിന്റെ ആഭിമുഖ്യത്തില്‍ പൊതുജനങ്ങളേയും ജില്ലയിലെ എല്ലാ സര്‍ക്കാര്‍-സ്വകാര്യ സ്ഥാപനങ്ങളിലേയും ജീവനക്കാരേയും പങ്കെടുപ്പിച്ച് ജൂണ്‍ നാലിന് ജില്ലയില്‍ കൊതുക് നിവാരണ ദിനം ആചരിക്കും. കൂട്ടായ ഒരു യത്‌നത്തിലൂടെ കൊതുകിന്റെ പ്രജനന ഉറവിടം കണ്ടെത്തി നശിപ്പിക്കുകയാണ് ദിനാചരണത്തിന്റെ ലക്ഷ്യം. ഓരോ സ്ഥാപനത്തിലേയും ജീവനക്കാര്‍ അതത് സ്ഥാപനങ്ങളും പരിസരവും ശുചീകരിക്കണം. വീടും പരിസരവും വീട്ടുകാര്‍ തന്നെ ശുചീകരിക്കണം. വെള്ളം കെട്ടിനിന്ന് കൊതുക് വളരുന്നതിനുള്ള സാഹചര്യം കണ്ടെത്തി നശിപ്പിക്കണം.
പൊതുസ്ഥലങ്ങളിലും റോഡുകളിലും ഓടകളിലും ശുചീകരണ പ്രവര്‍ത്തനങ്ങള്‍ക്ക് റെസിഡന്‍ഷ്യല്‍ അസോസിയേഷനുകള്‍ നേതൃത്വം നല്‍കണം. മെഡിക്കല്‍ കോളജ് ഉള്‍പ്പെടെയുള്ള ആശുപത്രികളിലെ കൊതുകു നിവാരണ പ്രവര്‍ത്തനങ്ങള്‍ ജില്ലാ മെഡിക്കല്‍ ഓഫീസറുടെ മേല്‍നോട്ടത്തില്‍ പരിശോധിക്കും.പട്ടികജാതി കോളനികളിലെ ശുചീകരണ പ്രവര്‍ത്തനങ്ങള്‍ക്ക് ജില്ലാ പട്ടികജാതി വികസന ഓഫീസ് നേതൃത്വം നല്‍കണമെന്നാണ് ജില്ലാ കളക്ടര്‍ നിര്‍ദേശം നല്‍കിയിട്ടുണ്ട്. മത്സ്യത്തൊഴിലാളി മേഖലകളില്‍ ഫിഷറീസ് വകുപ്പ് ഉദ്യോഗസ്ഥര്‍ ശുചീകരണ പ്രവര്‍ത്തനങ്ങള്‍ക്ക് നേതൃത്വം നല്‍കും.
കൂടുതല്‍ ദിവസം വെള്ളം ശേഖരിച്ചുവയ്ക്കാനുപയോഗിക്കുന്ന വീടുകളില്‍ കൊതുകു വളരുന്നതിനുള്ള സാഹചര്യം കൂടുതലായതിനാല്‍ ഏറ്റവും കുറഞ്ഞ ഇടവേളകളില്‍ തന്നെ ജലവിതരണം നടത്തണമെന്ന് വാട്ടര്‍ അതോറിറ്റിക്കും ഫോഗിംഗ് നടത്തുന്നതിന് ആവശ്യമായ മണ്ണെണ്ണ ലഭ്യമാക്കുന്നതിന് ജില്ലാ സപ്ലൈ ഓഫീസിനും ജില്ലാ കളക്ടര്‍ നിര്‍ദേശം നല്‍കി. ഇതരസംസ്ഥാന തൊഴിലാളികളുടെ ക്യാമ്പുകളില്‍ ശുചീകരണ അറിയിപ്പ് ആരോഗ്യ വകുപ്പ് ജീവനക്കാര്‍ നേരിട്ടെത്തി നല്‍കും.
