കോഴിക്കോട്: ജില്ലയിലെ സിപിഎമ്മിന്റെ തെരഞ്ഞെടുപ്പ് ചുമതല പി. ജയരാജനെ ഏല്‍പ്പിച്ചതു വടകരയിലും പരിസരപ്രദേശങ്ങളിലും വ്യാപകമായ അക്രമങ്ങള്‍ സംഘടിപ്പിക്കാനാണെന്ന മുല്ലപ്പള്ളി രാമചന്ദ്രന്‍ എംപിയുടെ പ്രസ്താവനയ്‌ക്കെതിരെ സിപിഎം. ജന്മസിദ്ധമായ കമ്യൂണിസ്റ്റ് വിരോധത്തിന്റെ പുളിച്ചുതികട്ടലാണ് മുല്ലപ്പള്ളിയുടെ പ്രസ്താവനയെന്ന സിപിഎം ജില്ലാസെക്രട്ടേറിയറ്റ് അഭിപ്രായപ്പെട്ടു.
അപഹാസ്യമായ അസംബന്ധം വിളമ്പുകയാണ് മുല്ലപ്പള്ളി. ആര്‍എസ്എസുമായി യുഡിഎഫുണ്ടാക്കിയ രഹസ്യധാരണ പുറത്തായ സാഹചര്യത്തിലുള്ള മുല്ലപ്പള്ളിയുടെ പ്രസ്താവനയില്‍ അസ്വാഭാവികതയില്ല. ആര്‍എസ്എസ് താത്പര്യവും കേന്ദ്ര ആഭ്യന്തരമന്ത്രി രാജ്‌നാഥ്‌സിംഗിന്റെ സമ്മര്‍ദവുമനുസരിച്ചാണ് കതിരൂര്‍ മനോജ് വധക്കേസില്‍ മന്ത്രി രമേശ് ചെന്നിത്തല യുഎപിഎ ചുമത്തിയതും സിബിഐ പി. ജയരാജനെ പ്രതിയാക്കിയതും.
പഴയ ചെറുപയര്‍ പട്ടാളത്തിന്റെ കമ്യൂണിസ്റ്റ് വിരോധം മനസ്സില്‍ ഇന്നും കൊണ്ടുനടക്കുന്ന മുല്ലപ്പള്ളി മുസ്‌ലിംലീഗ് ക്രിമിനലുകളെക്കുറിച്ച് നിശ്ശബ്ദത പാലിക്കുകയാണ്. കോണ്‍ഗ്രസുകാരെ ലീഗുകാര്‍ ആക്രമിച്ചാല്‍ മൗനംപാലിക്കുന്ന മുല്ലപ്പള്ളി സിപിഎമ്മിനെതിരെ പ്രസ്താവനയിറക്കി ആരെയാണ് സന്തോഷിപ്പിക്കുന്നതെന്ന് ജനങ്ങള്‍ക്ക് മനസ്സിലാക്കുമെന്നും സെക്രട്ടേറിയറ്റ് പ്രസ്താവനയില്‍ പറഞ്ഞു.
നരിക്കാട്ടേരി ബോംബ് സ്‌ഫോടനം തൊട്ട് നാദാപുരം-കുറ്റിയാടി മേഖലകളില്‍ നിരവധി അക്രമസംഭവങ്ങളെക്കുറിച്ചുള്ള അന്വേഷണം പോലും അവസാനിപ്പിച്ചത് ലീഗ് ഉന്നതര്‍ക്കുള്ള പങ്ക് കണ്ടെത്തിയതോടെയാണ്. അടുത്തിടെ നാദാപുരം-കുറ്റിയാടി മേഖലകളില്‍ നടന്ന പല അക്രമസംഭവങ്ങളിലും പ്രതികളെ കണ്ടെത്താന്‍ പോലീസിന് കഴിയാതിരുന്നതും ഉന്നത ഇടപെടല്‍ മൂലമാണ്.
വര്‍ഗീയ ക്രിമിനല്‍ ശക്തികളെ കൂട്ടുപിടിച്ച് അവരുടെ അക്രമങ്ങള്‍ക്ക് ഒത്താശചെയ്തുകൊടുക്കുന്ന മുല്ലപ്പള്ളിയെപ്പോലുള്ള കോണ്‍ഗ്രസ് നേതാക്കളുടെ നീക്കം ജനങ്ങളും സാധാരണ കോണ്‍ഗ്രസ് പ്രവര്‍ത്തകരും തിരിച്ചറിയുന്നതായും സെക്രട്ടേറിയറ്റ് പ്രസ്താവനയില്‍ പറഞ്ഞു.
