പോലീസ് സ്റ്റേഷനില് പോകാന്‍ ഇന്നും സാധാരണ ആളുകള്‍ക്ക് മടിയാണ്, പ്രത്യേകിച്ച് സ്ത്രീകള്‍ക്ക്. പോലീസ് എത്രയൊക്കെ മാറിയെന്ന് പറഞ്ഞാലും ആളുകള്‍ പഴയതൊക്കെ മറക്കുമോ? ഇതിനൊരു പരിഹാരവുമായെത്തിയിരിക്കുകയാണ് ഉത്തരാഖണ്ഡ് പോലീസ്. പരാതി നല്‍കാനും മറ്റുമായി ഒരു മൊബൈല്‍ ആപ്ലിക്കേഷനാണ് ഇതിനായി പോലീസ് വികസിപ്പിച്ചെടുത്തിരിക്കുന്നത്. പരാതി നല്‍കാന്‍ മാത്രമല്ല, കൈക്കൂലി സംബന്ധമായ പരാതികള്‍, കാണാതായ സംഭവം, ആളുകളുടെ വേരിഫിക്കേഷന്‍, ട്രാഫിക്ക് ജാം സംബന്ധമായ പരാതി, പ്രതികളെക്കുറിച്ചുള്ള വിവരങ്ങള്‍ തുടങ്ങിയ കാര്യങ്ങള്‍ ആപ്പിലൂടെ പോലീസിന് കൈമാറാം.
സ്ത്രീകള്‍ക്കാണ് ഈ ആപ്പുകൊണ്ട് ഏറെ പ്രയോജനം. സൈബര്‍ കുറ്റകൃത്യങ്ങള്‍, മാനഭംഗക്കേസുകള്‍ തുടങ്ങിയ കാര്യങ്ങളില്‍ പോലീസ് സ്റ്റേഷനില് പോകാതെ പരാതി നല്‍കാന്‍ സാധിക്കും. പരാതി സ്വീകരിക്കുക മാത്രമല്ല, പരാതി സ്വീകരിച്ചതായുള്ള രസീതും ആപ്ലിക്കേഷന്‍ വഴിലഭിക്കും. ഉത്തരാഖണ്ഡില്‍ ആയിരക്കണക്കിന് ആളുകളാണ് ആപ്പ് വഴി പോലീസ് സ്‌റ്റേഷന്‍ സേവനം ഉപയോഗിക്കുന്നത്. ഉത്താരഖണ്ഡില്‍ ഹിറ്റായ സ്ഥിതിക്ക് ആപ്പ് മറ്റു സംസ്ഥാനങ്ങളും നടപ്പിലാക്കുമോയെന്നാണ് ഇനി അറിയേണ്ടത്. ആളുകള്‍ ന്യൂജന്‍ ആകുമ്പോള്‍ എന്തിനാണ് പോലീസ് വാട്‌സ്ആപില്‍ മാത്രം ഒതുങ്ങുന്നത്? പുതിയ ആപുകള്‍ ഉണ്ടാക്കി പോലീസിന് കുറ്റവാളികള്‍ക്ക് “ആപ്പ്’ വയ്ക്കാമല്ലോ.
-എസ്ടി
