കോട്ടയം: ജില്ലയില്‍ കഴിഞ്ഞ രണ്ടാഴ്ച്ചയ്ക്കിടെ നടന്ന പിടിച്ചുപറി കേസില്‍ രണ്ടു പേര്‍ പിടിയിലായതായി സൂചന. ബൈക്കിലെത്തി സ്ത്രീകളുടെ മാലയും ബാഗും കവരുന്ന സംഘത്തിലെ രണ്ടുപേരെയാണ് ഇന്നലെ അര്‍ധരാത്രിയില്‍ പോലീസ് പിടികൂടിയിരിക്കുന്ന തെന്നാണ് സൂചന കിട്ടിയിരിക്കുന്നത്. 18 നും 25 നും ഇടയില്‍ പ്രായമുള്ള ചിങ്ങവനം സ്വദേശികളാണിവരെന്നാണ് അറിയാനായത്. ഇവരുടെ അറസ്റ്റ് വൈകുന്നേരത്തോടെയുണ്ടായേക്കും. ‘
ഇരുചക്രവാഹനങ്ങളിലെത്തി പിടിച്ചുപറി നടത്തുന്ന യുവാക്കളുടെ സംഘം നഗരത്തില്‍ പിടിമുറുക്കിയതായി പോലീസ് പറഞ്ഞിരുന്നു. 15നും 22 നും ഇടയില്‍ പ്രായമുള്ളവരാണിവര്‍. കഞ്ചാവിന്റെ ലഹരിയാണ് ഇവരെ കുറ്റകൃത്യങ്ങള്‍ക്ക് പ്രേരിപ്പിക്കുന്നതെന്നും പോലീസ് പറയുന്നു. കഴിഞ്ഞ ദിവസം ബൈക്ക് യാത്രക്കാരായ ദമ്പതികളുടെ ബാഗ് മറ്റൊരു ബൈക്കിലെത്തിയ സംഘം തട്ടിയെടുത്തിരുന്നു. അതേപോലെ കാല്‍നട യാത്രക്കാരിയുടെ ബാഗും ബൈക്കിലെത്തിയ സംഘം തട്ടിയെടുത്തു.
കളത്തിപ്പടിയിലെ സ്കൂളിനു സമീപം കുട്ടിയെ സ്കൂളിലാക്കി മടങ്ങിയ വീട്ടമ്മയുടെ പഴ്‌സും മൊബൈല്‍ ഫോണും ബൈക്കിലെത്തി സംഘം പിടിച്ചുപറിച്ച സംഭവം ഉണ്ടായത് കഴിഞ്ഞ ആഴ്ച്ചയാണ്. അന്നു രാത്രി തന്നെ ഇരുചക്രവാഹനത്തില്‍ സഞ്ചരിക്കുകയായിരുന്ന വനിതാ ഡോക്ടറെ ബൈക്കിലെത്തിയ കവര്‍ച്ചാ സംഘം ഇടിച്ചുവീഴ്ത്തി ബാഗ് മോഷ്ടിച്ചിരുന്നു.
കഞ്ചാവ് വാങ്ങാന്‍ പണമില്ലാത വരുമ്പോള്‍ എങ്ങനെയും പണമുണ്ടാക്കണമെന്ന ചിന്തയാണ് ഇത്തരത്തില്‍ കുറ്റകൃത്യങ്ങള്‍ക്ക് ഇവരെ പ്രേരിപ്പിക്കുന്നതെന്നാണ് പോലീസിന്റെ ഭാഷ്യം. നഗരത്തിലെ കഞ്ചാവ് വില്പനയും ഉപഭോഗവും തടയുന്നതിനുള്ള കര്‍ശന നടപടികള്‍ സ്വീകരിച്ചതായി ഡിവൈഎസ്പി ബിജു കെ.സ്റ്റീഫന്‍ അറിയിച്ചു.
