കോട്ടയം: പ്രായപൂര്‍ത്തിയാകാത്ത കുട്ടിയെ പീഡിപ്പിച്ച അധ്യാപകന് 17 വര്‍ഷം കഠിനതടവും അരലക്ഷം രൂപ പിഴയും. നഗരത്തിലെ സ്‌കൂളിലെ അധ്യാപകനായിരുന്ന താഴത്തങ്ങാടി പാറപ്പാടം കൊട്ടാരത്തുംപറമ്പ് മനോജി (50)നെയാണ് കോട്ടയം ഫാസ്റ്റ്ട്രാക്ക് സ്‌പെഷല്‍ കോടതി പോക്സോ ജഡ്ജി സതീഷ് കുമാര്‍ ശിക്ഷിച്ചത്.
പോക്സോ നിയമത്തിലെ രണ്ട് വകുപ്പുകള്‍ പ്രകാരം ഏഴു വര്‍ഷം വീതം കഠിനതടവും 25,000 രൂപ പിഴയും, ജുവനൈല്‍ ജസ്റ്റിസ് ബോര്‍ഡിലെ വകുപ്പ് പ്രകാരം മൂന്നു വര്‍ഷം കഠിന തടവുമാണ് ശിക്ഷിച്ചത്. പിഴ അടച്ചില്ലെങ്കില്‍ ആറു മാസം തടവ് അനുഭവിക്കേണ്ടി വരും. ശിക്ഷ ഒന്നിച്ച് അനുഭവിച്ചാല്‍ മതിയെന്നതിനാല്‍ ഏഴു വര്‍ഷം ശിക്ഷ അനുഭവിച്ചാല്‍ മതിയാകും.
2023 ലായിരുന്നു കേസിനാസ്പദമായ സംഭവം. ട്യൂഷന്‍ പഠിക്കാനെത്തിയ വിദ്യാര്‍ഥിയെ ഇയാള്‍ പലതവണയായി പ്രകൃതിവിരുദ്ധ ലൈംഗിക പീഡനത്തിന് ഇരയാക്കുകയായിരുന്നുവെന്നാണു പരാതി. പരാതിയുടെ അടിസ്ഥാനത്തില്‍ കോട്ടയം വെസ്റ്റ് പോലീസ് സ്റ്റേഷന്‍ ഹൗസ് ഓഫിസര്‍ കെ.ആര്‍. പ്രശാന്ത്കുമാറാണ് കേസെടുത്തത്.
തുടര്‍ന്ന് ഇയാളെ അറസ്റ്റ് ചെയ്തു കോടതിയില്‍ ഹാജരാക്കി റിമാന്‍ഡ് ചെയ്തു. വെസ്റ്റ് എസ്‌ഐ ജയകുമാര്‍, അജ്മല്‍ ഹുസൈന്‍ എന്നിവരാണു കേസ് അന്വേഷിച്ച് കുറ്റപത്രം സമര്‍പ്പിച്ചത്. പ്രോസിക്യൂഷനുവേണ്ടി കോടതിയില്‍ പബ്ലിക് പ്രോസിക്യൂട്ടര് പോള്‍ കെ.ഏബ്രഹാം ഹാജരായി.
