കൊച്ചി: കോവിഡ് 19 പ്രതിരോധ പ്രവർത്തനങ്ങൾ ഉൗർജിതമായി തുടരുന്നതിനിടെ എറണാകുളം ജില്ലയിൽ വിവിധ ആശുപത്രികളിലായി ഐസൊലേഷനിലുള്ളത് 35 പേർ. ഇന്നലെ രണ്ടു പേരെ കൂടി കളമശേരി മെഡിക്കൽ കോളജിലെ ഐസൊലേഷൻ വാർഡിൽ പ്രവേശിപ്പിച്ചു.
ഇവിടെനിന്ന് ഇന്നലെ ആറു പേരെ ഡിസ്ചാർജ് ചെയ്തു. ഇതോടെയാണു വിവിധ ആശുപത്രികളിൽ ഐസൊലേഷനിലുള്ളവരുടെ ആകെ എണ്ണം 35 ആയത്. ഇതിൽ 19 പേർ കളമശേരി മെഡിക്കൽ കോളജിലും, നാലുപേർ ആലുവ ജില്ലാ ആശുപത്രിയിലും, പത്തു പേർ സ്വകാര്യ ആശുപത്രിയിലും രണ്ടു പേർ കരുവേലിപ്പടി താലൂക്ക് ആശുപത്രിയിലുമാണ് കഴിയുന്നത്.
ഇന്നലെ പുതിയതായി 42 പേരെയാണു വീടുകളിൽ നിരീക്ഷണത്തിൽ കഴിയാൻ നിർദേശിച്ചത്. വീടുകളിൽ നിരീക്ഷണത്തിൽ ഉണ്ടായിരുന്ന 512 പേരെ നിരീക്ഷണ കാലയളവ് പൂർത്തിയായതിനെ തുടർന്ന് നിരീക്ഷണ പട്ടികയിൽനിന്ന് ഒഴിവാക്കി. ഇതോടെ വീടുകളിൽ നിരീക്ഷണത്തിൽ ഉള്ളവരുടെ എണ്ണം 672 ആയി.
ആശുപത്രികളിലും, വീടുകളിലും ആയി നിലവിൽ നിരീക്ഷണത്തിൽ കഴിയുന്നത് 707 പേരാണ്. ജില്ലയിലെ രണ്ട് കോവിഡ് കെയർ സെന്‍ററുകളിലായി 25 പേരും നിരീക്ഷണത്തിലുണ്ട്. നിലവിൽ 138 കമ്മ്യൂണിറ്റി കിച്ചണുകളാണ് എറണാകുളം ജില്ലയിൽ പ്രവർത്തിക്കുന്നത്. ഇതിൽ 96 എണ്ണം പഞ്ചായത്തുകളിലും 42 എണ്ണം നഗരസഭ പ്രദേശത്തുമാണ്. ഇവവഴി ഇന്നലെ 42,194 പേർക്ക് ഭക്ഷണം നൽകി. ഇതിൽ 15,560 പേർ അതിഥി തൊഴിലാളികളാണ്.
ജില്ലാ മാനസികാരോഗ്യ പരിപാടിയുടെ നേതൃത്വത്തിൽ ഇന്നലെ നിരീക്ഷണത്തിൽ കഴിയുന്ന 391 പേർക്ക് കൗണ്‍സലിംഗ് നൽകി. ഇത് കൂടാതെ കണ്ട്രോൾ റൂമിലേക്ക് വിളിച്ച 12 പേർക്കും ഇത്തരത്തിൽ കൗണ്‍സലിംഗ് നൽകി. വീടുകളിൽ നിരീക്ഷണത്തിൽ കഴിയുന്ന 85 ഗർഭിണികളുടെ ആരോഗ്യ വിവരങ്ങൾ ആരോഗ്യപ്രവർത്തകർ ഫോണ് വഴി ശേഖരിച്ചു ആവശ്യമായ നിർദേശങ്ങൾ നൽകി.
ജില്ലാ പാലിയേറ്റീവ് യൂണിറ്റിൽനിന്ന് നിരീക്ഷണത്തിൽ കഴിയുന്ന 112 വയോജനങ്ങളെ വിളിക്കുകയും പ്രശ്നങ്ങൾ പരിഹരിക്കുകയും ചെയ്തു. ഇന്നലെ 187 ഫോണ് വിളികളാണ് കണ്ട്രോൾ റൂമിലെത്തിയത്. ഇതിൽ 109 എണ്ണവും പൊതുജനങ്ങളിൽനിന്നായിരുന്നു.
ഇതിനിടെ കൊറോണ പ്രതിരോധ പ്രവർത്തനങ്ങളുടെ ഭാഗമായുള്ള ബോധവത്ക്കരണ പ്രവർത്തനങ്ങൾ തുടരുകയാണ്. കാക്കനാട്, അങ്കമാലി, മൂവാറ്റുപുഴ എന്നിവിടങ്ങളിൽ അതിഥി തൊഴിലാളികളുടെ ക്യാന്പുകളിൽ ബോധവൽക്കരണം നടത്തി.
നിരീക്ഷണത്തിൽ കഴിയുന്നവർക്ക് ഡോക്ടറുമായി നേരിട്ട് സംസാരിക്കാനായി ആരംഭിച്ച വീഡിയോ കോൾ സംവിധാനത്തിൽനിന്ന് ഇന്നലെ 23 പേരെ വിളിച്ചു. ഇവർ ഡോക്ടറോട് സംസാരിക്കുകയും ആശങ്കകൾ പരിഹരിക്കുകയും ചെയ്തതായി അധികൃതർ വ്യക്തമാക്കി.
