കാണ്‍പൂര്‍: ടെസ്റ്റ്, ഏകദിന പരമ്പരകളില്‍ വെന്നിക്കൊടി പാറിച്ച് എത്തിയ ഇന്ത്യയെ ഇംഗ്ലണ്ട് ട്വന്‍റി 20യില്‍ തളച്ചു. ട്വന്‍റി 20 പരമ്പരയിലെ ആദ്യമത്സരത്തില്‍ ഇംഗ്ലണ്ട് ഏഴു വിക്കറ്റിനാണ് വിജയം നേടിയത്. ടോസ് ഉള്‍പ്പെടെ ഇന്ത്യക്കു തൊട്ടതെല്ലാം പിഴച്ച ദിവസമായിരുന്നു വ്യാഴാഴ്ച. മൂന്നു മത്സര ട്വന്‍റി 20 പരമ്പരയിലെ ഒന്നാം മത്സരം വിജയിച്ചതോടെ ഇംഗ്ലണ്ട് പരമ്പരയില്‍ 1-0ത്തിന് മുന്നിലെത്തി. ടോസ് നേടിയ ഇംഗ്ലണ്ട് ഇന്ത്യയെ ബാറ്റിംഗിനയയ്ക്കുകയായിരുന്നു. ഋഷഭ് പന്തിനെ ഓപ്പണിംഗ് സ്ഥാനത്തു പരീക്ഷിക്കാതെ നായകന്‍ വിരാട് കോഹ്‌ലിയാണ് കെ.എല്‍. രാഹുലിനൊപ്പം ആദ്യമിറങ്ങിയത്. എന്നാല്‍, ആ നീക്കവും ഓപ്പണിംഗിലെ ഇന്ത്യയുടെ ദുര്‍ഗതി മാറ്റാന്‍ സഹായകമായില്ല. എട്ടു റണ്‍സുമായി രാഹുല്‍ മടങ്ങി. ആദ്യത്തെ വെടിക്കെട്ടിനു ശേഷം കോഹ്‌ലിയും മടങ്ങി.
മറുപടി ബാറ്റിംഗിനിറങ്ങിയ ഇംഗ്ലണ്ടിനെ ഒരുഘട്ടത്തില്‍ പോലും വിജയത്തില്‍ നിന്നകറ്റാന്‍ ഇന്ത്യന്‍ ബോളര്‍മാര്‍ക്കു സാധിച്ചില്ല. 42 റണ്‍സ് നീണ്ട സഖ്യത്തിനൊടുവിലാണ് ജേസണ്‍ റോയ് – സാം ബില്ലിംഗ്‌സ് കൂട്ടുക്കെട്ടു വേര്‍പിരിഞ്ഞത്. ആ ഓവറില്‍ഡ ബില്ലിംഗ്‌സും പുറത്തായെങ്കിലും ഏകദിന പരമ്പരയിലെ ഫോം തുടര്‍ന്ന ജോ റൂട്ടും ഇയോണ്‍ മോര്‍ഗനും ഇംഗ്ലണ്ടിനെ വിജയത്തിലേക്ക് നയിച്ചു. 51 റണ്‍സ് നേടി മോര്‍ഗന്‍ പുറത്തായെങ്കിലും അപ്പോഴേക്കും ഇംഗ്ലണ്ട് സ്‌കോര്‍ 126 റണ്‍സില്‍ എത്തിയിരുന്നു. പിന്നീട് 46 റണ്‍സോടെ റൂട്ടും രണ്ടു റണ്‍സോടെ സ്‌റ്റോക്‌സും ഇംഗ്ലണ്ടിനെ ലക്ഷ്യത്തിലെത്തിച്ചു. ഇന്ത്യക്കു വേണ്ടി യുഷ്‌വേന്ദ്ര ചാഹല്‍ രണ്ടു വിക്കറ്റുകള്‍ സ്വന്തമാക്കിയപ്പോള്‍ പര്‍വേസ് റസൂല്‍ ഒരു വിക്കറ്റ് പേരിലാക്കി.
