മലയാളത്തിലെ ഏറെ ശ്രദ്ധ നേടിയ നിര്‍മാണക്കമ്പനികളില്‍ ഒന്നായ ഭാവന സ്റ്റുഡിയോസിന്‍റെ ആറാമത്തെ ചിത്രം പ്രഖ്യാപിച്ചു. ഭാവന സ്റ്റുഡിയോസിന്‍റെ ബാനറിൽ ദിലീഷ് പോത്തന്‍, ഫഹദ് ഫാസില്‍, ശ്യാം പുഷ്കരന്‍ എന്നിവർ ചേർന്നു നിർമിക്കുന്ന പുതിയ ചിത്രമായ ‘ബത്‌ലഹേം കുടുംബ യൂണിറ്റി’ൽ നിവിൻ പോളിയും മമിത ബൈജുവുമാണു പ്രധാന വേഷങ്ങളിൽ. ‘പ്രേമലു’ സംവിധാനം ചെയ്ത ഗിരീഷ് എ ഡിയാണു സംവിധായകൻ.
“കുമ്പളങ്ങി നൈറ്റ്സ്’ മുതല്‍ “പ്രേമലു’ വരെ ഭാവന സ്റ്റുഡിയോസ് നിർമിച്ച അഞ്ച് സിനിമകളും ഏറെ പ്രേക്ഷക – നിരൂപക പ്രശംസ നേടിയവയാണ്. വൻ വിജയമായ ‘പ്രേമലു’വിനു പിന്നാലെ ഭാവന പ്രൊഡക്ഷൻ നമ്പർ -6 ആയി വരാനിരിക്കുന്ന പുതിയ ചിത്രത്തിനു തിരക്കഥയൊരുക്കുന്നതു ഗിരീഷ് എ.ഡിയും കിരൺ ജോസിയും ചേർന്നാണ്.
റൊമാന്‍റിക് കോമഡി ജോണറിൽ തന്നെയാണ് ഈ ചിത്രവും ഒരുങ്ങുന്നത്.വിഷ്ണു വിജയ് ആണ് സംഗീത സംവിധാനം. ഛായാഗ്രഹണം: അജ്മൽ സാബു, എഡിറ്റർ: ആകാശ് ജോസഫ് വർഗീസ്. സെപ്റ്റംബറിലാണു സിനിമയുടെ ഷൂട്ടിംഗ്. ഭാവന റിലീസ് ആണു വിതരണം.
പിആർഒ: ആതിര ദിൽജിത്ത്.
