കൊല്ലത്ത് വീട്ടുമുറ്റത്ത് കളിച്ചുകൊണ്ടിരുന്ന നാലുവയസുകാരന്റെ കീഴ്ച്ചുണ്ട് തെരുവുനായ കടിച്ചുകീറിയ പത്രവാര്‍ത്തയ്‌ക്കൊപ്പമാണ് താരത്തിന്റെ പോസ്റ്റ്. പട്ടിക്കാണോ കുട്ടിക്കാണോ ഇവിടെ വിലയെന്ന് ജയസൂര്യ ചോദിക്കുന്നു. നമ്മുടെ വീട്ടില്‍ ആര്‍ക്കെങ്കിലുമാണ് ഇതു സംഭവിച്ചിരുന്നതെങ്കില്‍ നമ്മള് എന്തു ചെയ്യുമെന്നും ഇതുതന്നെയാണ് ആ ചോദ്യത്തിന് ഉത്തരമെന്നും താരം പറഞ്ഞുവയ്ക്കുന്നു.
തെരുവുനായകളെ സംരക്ഷിക്കാന്‍ നിയമം പാസാക്കുന്നവര്‍ ആ കുട്ടിയുടെ വീട്ടിലെ പട്ടിണി അറിയുന്നുണേ്ടാ, പണം കൊടുക്കുന്നതു മാത്രമാണോ പരിഹാരം. ഇനി അതുണ്ടാകാതിരിക്കാന്‍ എന്തു ചെയ്യണം എന്നല്ലേ നോക്കേണ്ടത് ജയസൂര്യ പറയുന്നു. തെരുവിലെ പട്ടിയുടെ വില പോലും തന്നില്ലെങ്കില്‍ തിരിച്ചും ആ വില തരാനേ നിവൃത്തിയുള്ളൂവെന്നും പ്രശ്‌നത്തിനൊരു തീരുമാനമുണ്ടായില്ലെങ്കില്‍ ഈനാട്ടിലെ ചെറുപ്പക്കാര്‍ തന്നെ തീരുമാനമുണ്ടാക്കുമെന്നും ജയസൂര്യ പറയുന്നു.
ജയസൂര്യയുടെ ഫേസ്ബുക്ക് പോസ്റ്റിന്റെ പൂര്‍ണരൂപം:
“”പട്ടി-ണി”
ദൈവം പ്രത്യക്ഷപ്പെട്ടിട്ട് ചോദിക്കാണ്, നിന്റെ മുന്നില്‍ രണ്ട് ജീവനുകള്‍ ഉണ്ട്. ഒരു പട്ടിയും, നിന്റെ കുട്ടിയും അതിലെ ഒരു ജീവന്‍ നിനക്ക് തിരഞ്ഞെടുക്കാം എന്ന് പറഞ്ഞാല്‍ എന്തായിരിക്കും നമ്മുടെ ഉത്തരം. ? ദാ … ഇത് ഇന്നത്തെ പത്രമാണ്. ഇവിടെ പട്ടിയക്കാണോ, കുട്ടിയക്കാണോ വില?.നമ്മുടെ വീട്ടിലെ ആര്‍ക്കെങ്കിലുമാണ് ഇത് സംഭവിച്ചത് എങ്കില്‍ നമ്മള് എന്ത് ചെയ്യും ” അത് തന്നെയാണ് ഇതിന്റെ ഉത്തരം ” അങ്ങനെ ചെയ്ത് പോകുന്നത് ആ തെരുവ് നായയേക്കാള്‍ . വീട്ടിലുള്ളവരെ നമ്മള് സ്‌നേഹിക്കുന്നത് കൊണ്ടാണ്.
ഇതിപ്പോ സ്ഥിരം പത്രവാര്‍ത്തയാണ്, തെരുവിലെ പട്ടി കുഞ്ഞിന്റെ ചുണ്ട് കടിച്ച്പറിച്ചു , അമ്മയുടെ കാല് കടിച്ചുകീറിന്നൊക്കെ.. ഇനി, ഈ കടിയേറ്റ കുട്ടിയുടെ വീട്ടിലേക്ക്, ഈ നിയമം പാസാക്കിയവര്‍ ഒന്ന് തിരിഞ്ഞ് നോക്കുന്നുണേ്ടാ?അവിടത്തെ പട്ടിണി അറിയുന്നുണേ്ടാ? ഒരു പത്ത് പൈസ അയച്ച് കൊടുക്കുന്നുണേ്ടാ? അല്ലെങ്കില്‍ ആ പൈസ കൊടുക്കുന്നതാണോ അതിനൊരു പരിഹാരം.. അത് ഇനി ഉണ്ടാവാതിരിക്കാന്‍ എന്ത് ചെയ്യണം എന്നതല്ലേ നോക്കേണ്ടത്? അതെന്താ ചെയ്യാത്തത്? എല്ലാം നമ്മള് അനുഭവിച്ചോട്ടേന്നോ?
രാപകലില്ലാതെ ജവാന്‍മാര്‍ നമ്മുടെ സംരക്ഷയ്ക്കായി കാവലാണ്. ഇത്രയധികം സുരക്ഷിതത്വം നോക്കുന്ന നമ്മുടെ ഈ സംസ്ഥാനത്ത് ഇതിനെന്താ ഒരു പരിഹാരം ഉണ്ടാവാത്തത്.. മരത്തില്‍ കേറുന്നതാണോ പരിഹാരം.. അവരുടെ മകനെയാണ് ഇതുപോലെ കടിച്ച് പറിച്ച് ആശുപത്രിയില്‍ ഇട്ടിരുന്നതെങ്കില്‍, മോനെ…. നീ എന്താടാ ആ സമയത്ത് മരത്തില്‍ കേറാതിരുന്നത് എന്ന് ചോദിക്കോ? തെരുവിലെ ഒരു പട്ടിയുടെ വില പോലും ഞങ്ങള്‍ക്ക് തന്നില്ലെങ്കില്‍ തിരിച്ചും ആ വില തന്നെ തരാനെ ഞങ്ങള്‍ക്കും നിവര്‍ത്തിയുള്ളൂ…. ഇതിനൊരു തീരുമാനം ഇനിയും ഉണ്ടായില്ലെങ്കില്‍ ഈ നാട്ടിലെ ചെറുപ്പാക്കാര്‍ തന്നെ ഒരു തീരുമാനം ഉണ്ടാക്കും. അതില്‍ ചിലപ്പോ നിയമത്തിന്റെ വശങ്ങളുണ്ടാവില്ല പകരം നഷ്ടപ്പെട്ടതിന്റെ തിരിച്ചറിവ് മാത്രേ കാണൂ…
