എടത്വ: എടത്വ ഇലക്ട്രിക്കല്‍ സബ് ഡിവിഷന്‍ ഓഫീസില്‍ മോഷണം. 1,05,256 രൂപയാണ് മോഷണം പോയത്. സേഫ് ലോക്കറില്‍ പൂട്ടി വച്ചിരു ന്നതായിരുന്നു രൂപ. ആയിരത്തിന്റേയും അഞ്ഞൂറിന്റേയും നോട്ടുകളായിരുന്നു മോഷണം പോയതില്‍ അധികവും.
ഇന്നലെ മൂന്ന് മണിക്ക് ശേഷം വന്ന കളക്ഷന്‍ രൂപയായിരുന്നു ഇത്. കൗണ്ടര്‍ സ്ഥാപിച്ചിരിക്കുന്ന മുറിക്ക് പുറത്ത് മൂന്ന് കതകുകളാണുള്ളത്. മുറികളുടെ താഴ് അറത്ത് മാറ്റിയ നിലയിലും ലോക്കര്‍ താക്കോലുപയോഗിച്ച തുറന്ന നിലയിലുമാണ് കാണപ്പെട്ടത്. സേഫിന്റെ താക്കോല്‍ മുറിയില്‍ തന്നെ മേശക്കുള്ളിലാണ് സൂക്ഷിക്കുന്നതെന്നാണ് ജീവനക്കാര്‍ പറയുന്നത്.
ബില്‍ കൗണ്ടറിലെ വനിതാ ജീവനക്കാര്‍ രാവിലേയും വൈകിട്ടും രണ്ട് ഷിഫ്റ്റുകളിലായിട്ടാണ് ജോലി ചെയ്യുന്നത്. വൈകിട്ടത്തെ ജോലി കഴിഞ്ഞ് പോകുന്ന ആള്‍ കൗണ്ടറിലെ പണം എണ്ണി തിട്ടപ്പെടുത്തി സേഫില്‍ വച്ച് പൂട്ടി താക്കോല്‍ ഓഫീസിലെ മേശവലിപ്പിനുള്ളില്‍ സൂക്ഷി ക്കുകയാണ് ചെയ്യുന്നത്. രാവിലെ വരുന്ന ജീവനക്കാരിക്ക് താക്കോല്‍ കൈമാറാനായി മാത്രം വൈകിട്ടത്തെ ജീവനക്കാരി എത്തേണ്ടി വരുമെന്നതിനാലാണ് താക്കോല്‍ മേശക്കുള്ളില്‍ തന്നെ സൂക്ഷിക്കേണ്ടി വരുന്നതെന്ന് അധികൃതര്‍ പറഞ്ഞു.
രാത്രിയില്‍ നാലോളം ജീവനക്കാര്‍ കാഷ് കൗണ്ടറിന് സമീപത്തെ മുറിയില്‍ ഉണ്ടായിരുന്നു. രാവിലെ അഞ്ച് മണിക്ക് ചായ കുടിക്കാനായി പുറത്തിറങ്ങിയ ജീവനക്കാരാണ് കാഷ് കൗണ്ടറിലേക്കുള്ള മുറി തുറന്ന് കിടക്കുന്നത് ആദ്യം കണ്ടത്. തുടര്‍ന്ന് സൂപ്രണ്ടിനെ വിവരം അറിയിക്കുകയായിരുന്നു. എടത്വ പോലീസ് അന്വേഷണം ആരംഭിച്ചു. വൈദ്യുതി ചാര്‍ജ്ജ് സ്വീകരിക്കാന്‍ ബദല്‍ സംവിധാനം ഏര്‍പ്പെടുത്തിയിട്ടുണ്ട്.
