മോഹന്‍ലാലിന്റെ പുലിമുരുകന്‍ തിയറ്ററുകളില്‍ പ്രകമ്പനം സൃഷ്ടിച്ചു മുന്നേറുന്നു. റിലീസിംഗിന് മുന്‍പ് തന്നെ ചിത്രത്തിലെ ആക്്ഷന്‍ രംഗങ്ങള്‍ വാര്‍ത്തകളില്‍ നിറഞ്ഞിരുന്നു. ചിത്രം പുറത്തിറങ്ങിയതോടെ ആ രംഗങ്ങള്‍ വീണ്ടും വീണ്ടും കാണാന്‍ ആരാധകര്‍ തിയറ്ററുകളിലേക്ക് ഒഴുകിക്കൊണ്ടിരിക്കുകയാണ്. പുലിമുരുകനായി അവതരിച്ച മോഹന്‍ ലാലിന്റെ ആക്്ഷന്‍ പ്രകടനങ്ങള്‍ ആരാധകരെ മാത്രമല്ല അമ്പരപ്പിച്ചിരിക്കുന്നത്.
മരത്തിലേക്ക് ഓടിക്കയറുന്ന രംഗങ്ങള്‍ ശ്വാസമടക്കിപ്പിടിച്ചിരുന്നാണ് പലരും കണ്ടത്. ഈ അതിസാഹസിക രംഗങ്ങള്‍ ഒരുക്കിയത് പീറ്റര്‍ ഹെയ്‌നാണ്. ശിവാജി, അന്യന്‍, യന്തിരന്‍, ഐ, ബാഹുബലി തുടങ്ങിയ മെഗാഹിറ്റ് ചിത്രങ്ങളുടെയൊക്കെ ആക്്ഷന്‍ കൈകാര്യം ചെയ്ത, തെന്നിന്ത്യന്‍ സിനിമയിലെ തന്നെ ഏറ്റവും വിലയേറിയ സ്റ്റണ്ട് കൊറിയോഗ്രാഫര്‍ സാക്ഷാല്‍ പീറ്റര്‍ ഹെയ്ന്‍.
ഇപ്പോള്‍ പുലിമുരുകനിലെ ആക്ഷന്‍ രംഗങ്ങളുടെ രഹസ്യം വെളിപ്പെടുത്തി പീറ്റര്‍ തന്നെ ഒരു വീഡിയോ ഫേസ് ബുക്കിലൂടെ പുറത്തുവിട്ടിരിക്കുന്നു. മരത്തിലേക്ക് ഓടിക്കയറുന്ന രംഗം എങ്ങനെ ചിത്രീകരിച്ചിരിക്കുന്നു എന്നത് ഈ വീഡിയോയിലൂടെ മനസിലാക്കാം. ഈ വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലാണ്. കൂടാതെ ചിത്രത്തെ കുറിച്ച് മികച്ച പ്രതികരണങ്ങള്‍ ലഭിക്കുന്നതിലുള്ള സന്തോഷവും വീഡിയോയ്‌ക്കൊപ്പം പീറ്റര്‍ പങ്കുവയ്ക്കുന്നു.
പുലിമുരുകനിലെ പ്രകടനത്തെ സംബന്ധിച്ച് മികച്ച പ്രതികരണങ്ങള്‍ ലഭിക്കുന്നതില്‍ വളരെയധികം സന്തോഷമുണ്ട്. എല്ലാവരും സിനിമ ആസ്വദിക്കുകയും ആഘോഷിക്കുകയും ചെയ്യുന്നു എന്നറിയുന്നതിലും സന്തോഷം. ഈ അവസരത്തില്‍ സിനിമയുടെ ഓരോ അണിയറ പ്രവര്‍ത്തകരോടുമുള്ള നന്ദി ഞാന്‍ അറിയിക്കുന്നുവെന്നും ഫേസ് ബുക്ക് പേജില്‍ പീറ്റര്‍ ഹെയിന്‍ വ്യക്തമാക്കുന്നു.
