ആലപ്പുഴ: എസ്എന്‍ഡിപി യോഗത്തിന്റെ മൈക്രോഫിനാന്‍സ് പദ്ധതിയുമായി ബന്ധപ്പെട്ട് ക്രമക്കേടുണ്ടെന്ന് കണ്ടെത്തിയതിന്റെ അടിസ്ഥാനത്തില്‍ വിജിലന്‍സ് നടപടിക്കൊരുങ്ങവേ സമുദായ തലത്തില്‍ പ്രതിരോധം തീര്‍ക്കാന്‍ എസ്എന്‍ഡിപി ഒരുങ്ങുന്നു. യോഗത്തിന്റെ കീഴിലെ യൂണിയനുകളെയും ശാഖായോഗങ്ങളെയും അണിനിരത്തി വിജിലന്‍സ് നീക്കത്തിനെതിരെ പ്രതിരോധം തീര്‍ക്കാനാണ് എസ്എന്‍ഡിപി തീരുമാനം. ഇതിന്റെ തുടക്കം നാളെ ആലപ്പുഴയില്‍ നടക്കും. രാവിലെ ആലപ്പുഴ പ്രിന്‍സ് ഹോട്ടലില്‍ ചേരുന്ന നേതൃയോഗത്തിന് ശേഷം വൈകുന്നേരം ഇഎം
എസ് സ്‌റ്റേഡിയത്തില്‍ എസ്എന്‍ഡിപി നേതൃത്വത്തില്‍ പ്രതിഷേധ സംഗമം സംഘടിപ്പിച്ചിട്ടുണ്ട്. അമ്പലപ്പുഴ യൂണിയന്‍ ഓഫീസിന് സമീപത്തെ കിടങ്ങാംപറമ്പ് മൈതാനിയില്‍ നിന്നും നടക്കുന്ന പ്രതിഷേധ പ്രകടനത്തിനുശേഷമാണ് സംഗമം നടക്കുക. ജില്ലയിലെ മുഴുവന്‍ യൂണിയനു കീഴിലെ ശാഖായോഗങ്ങളില്‍ നിന്നുള്ള പ്രവര്‍ത്തകരെ പരിപാടിയില്‍ പങ്കെടുപ്പിക്കാനാണ് യോഗം നിര്‍ദേശം നല്കിയിരിക്കുന്നത്. പ്രതിഷേധ പരിപാടിയില്‍ ആളെ പങ്കെടുപ്പിക്കുന്നതിന് യൂണിയന്‍ നേതൃത്വം ശാഖാ നേതൃത്വങ്ങള്‍ക്ക് ഇതിനോടകം നിര്‍ദേശം നല്കിയിട്ടുണ്ട്.
11ന് സംസ്ഥാനത്തെ ജില്ലാ കേന്ദ്രങ്ങളില്‍ പ്രതിഷേധ സംഗമവും സംഘടിപ്പിച്ചിട്ടുണ്ട്. സമുദായംഗങ്ങള്‍ക്ക് സാമ്പത്തികമായ ഉന്നമനം ലക്ഷ്യമാക്കി നടപ്പാക്കിയ പദ്ധതിയെ ആരോപണങ്ങളുന്നയിച്ച് ഇല്ലാതാക്കാനുള്ള ശ്രമത്തിന്റെ ഭാഗമാണ് ക്രൈംബ്രാഞ്ച് അന്വേഷണം അടക്കമുള്ള നീക്കങ്ങളെന്നാണ് യോഗ നേതൃത്വത്തിന്റെ നിലപാട്. തേസമയം എസ്എന്‍ഡിപിയുടെ സമരം സര്‍ക്കാരിനെയോ രാഷ്ട്രീയ പാര്‍ട്ടികളെയോ വെല്ലുവിളിക്കാനല്ലെന്നും യോഗ നേതൃത്വം വ്യക്തമാക്കുന്നു.
സംഭവം സംബന്ധിച്ച് സത്യാവസ്ഥ ജനങ്ങളെ ബോധ്യപ്പെടുത്തുന്നതിനായാണ് ഇത്തരത്തില്‍ പ്രതിഷേധ പരിപാടികള്‍ സംഘടിപ്പിച്ചിരിക്കുന്നതെന്ന നിലപാടിലാണ് നേതൃത്വം. അതേസമയം മൈക്രോ ഫിനാന്‍സ് ഇടപാടുമായി ബന്ധപ്പെട്ട കേസില്‍ ക്രൈംബ്രാഞ്ച് അന്വേഷണം നടക്കുന്നതിനിടയില്‍ വിജിലന്‍സ് അന്വേഷണം വേണമോയെന്ന വിഷയത്തില്‍ വിജിലന്‍സ് നിയമോപദേശം തേടിയിരിക്കുകയാണ്. വിജിലന്‍സ് ഡയറക്ടര്‍ നിയമവിദഗ്ധരുമായി ആലോചിച്ചശേഷം അന്തിമ തീരുമാനമെടുത്തേക്കുമെന്നതാണ് വിവരം.
