ബ്രസല്‍സ്: കഴിഞ്ഞ വര്‍ഷം യൂറോപ്യന്‍ യൂണിയനിലെത്തിയ അഭയാര്‍ഥികളുടെ എണ്ണം തൊട്ടു മുന്‍ വര്‍ഷത്തെ അപേക്ഷിച്ച് ഇരട്ടിയിലേറെയായിരുന്നു എന്ന് കണക്ക്.
1,255,600 അഭയാര്‍ഥികളാണ് കഴിഞ്ഞ വര്‍ഷം യൂറോപ്പിലെത്തിയത്. ഇതില്‍ ഏറ്റവും കൂടുതല്‍ സിറിയക്കാര്‍ തന്നെ, ഇറാക്കില്‍നിന്നും അഫ്ഗാനിസ്ഥാനില്‍നിന്നുമുള്ളവരാണ് അടുത്ത സ്ഥാനങ്ങളില്‍.
വന്നവരില്‍ മൂന്നിലൊന്ന് ആളുകളും ജര്‍മനിയില്‍ താമസിക്കാനാണ് ആഗ്രഹിക്കുന്നത്. ഇപ്പോഴും ടര്‍ക്കി വഴി ഗ്രീസിലേക്ക് ദിവസേന ആയിരക്കണക്കിനു അഭയാര്‍ഥികളാണ് വന്നു ചേരുന്നത്.
മാസിഡോണിയ അതിര്‍ത്തി അടച്ചിരിക്കുന്നതു കാരണം ഇവരില്‍ പതിനായിരത്തോളം പേര്‍ ഇപ്പോള്‍ ഗ്രീസില്‍ കുടുങ്ങിക്കിടക്കുന്നു.
ശതമാനക്കണക്കില്‍ അഭയാര്‍ഥികള്‍ ഏറ്റവും കൂടിയത് ഫിന്‍ലന്‍ഡിലാണ്, 822 ശതമാനം. എന്നാല്‍, എണ്ണത്തില്‍ ഇത് 32,150 മാത്രം.
റിപ്പോര്‍ട്ട്: ജോസ് കുമ്പിളുവേലില്‍
