നേപ്പിള്‍സ്: ഇറ്റാലിയന്‍ സീരി എ ഫുട്‌ബോളില്‍ നാപ്പോളി പോയിന്‍റ് ടേബിളില്‍ ഒന്നാം സ്ഥാനത്ത്. ആറാം റൗണ്ട് പോരാട്ടത്തില്‍ ജെനോവയെ ഒന്നിന് എതിരേ രണ്ടു ഗോളുകള്‍ക്കു കീഴടക്കിയാണ് നാപ്പോളി ഒന്നാം സ്ഥാനത്ത് എത്തിയത്.
2025-26 സീസണില്‍ നാപ്പോളിയുടെ അഞ്ചാം ജയം. ജെഫ് എഖതോര്‍ 33-ാം മിനിറ്റില്‍ നേടിയ ഗോളില്‍ ആദ്യ പകുതിയില്‍ ജെനോവ ലീഡ് നേടിയിരുന്നു. എന്നാല്‍, ഫ്രാങ്ക് അംഗുയിസ (57’), റാസ്മസ് ഹോജ്‌ലണ്ട് (75’) എന്നിവരിലൂടെ നാപ്പോളി ജയം സ്വന്തമാക്കി.
യുവന്‍റസും എസി മിലാനും ഗോള്‍ രഹിത സമനിലയില്‍ പിരിഞ്ഞപ്പോള്‍ എഎസ് റോമ 2-1ന് ഫിയോറെന്‍റീനയെ തോല്‍പ്പിച്ചു. ബൊലോഞ്ഞ 4-0നു പിസയെ തകര്‍ത്തു.
ലീഗില്‍ ആറ് മത്സരങ്ങള്‍ പൂര്‍ത്തിയായപ്പോള്‍ 15 പോയിന്‍റ് വീതമുള്ള നാപ്പോളിയും എഎസ് റോമയുമാണ് യഥാക്രമം ഒന്നും രണ്ടും സ്ഥാനങ്ങളില്‍. എസി മിലാന്‍ (13), ഇന്‍റര്‍ മിലാന്‍ (12), യുവന്‍റസ് (12) ടീമുകളാണ് തുടര്‍ന്നുള്ള സ്ഥാനങ്ങളില്‍.
