ഒരു പൈലറ്റ് തന്‍റെ അമ്മയെ വിമാനത്തിലേക്ക് സ്വാഗതം ചെയ്തുകൊണ്ട് പറഞ്ഞ വാക്കുകളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. തന്‍റെ സ്വപ്നങ്ങൾ സാക്ഷാത്കരിക്കാൻ വേണ്ടി അമ്മ തന്നോടൊപ്പം എങ്ങനെയാണ് നിന്നതെന്ന് അദ്ദേഹം പറയുന്നതാണ് വീഡിയോ.
വിമാനത്തിലെ അനൗൺസ്മെന്‍റിന്‍റെ സമയത്താണ് ഇൻഡിഗോ വിമാനത്തിലെ ക്യാപ്റ്റൻ അമ്മയെ സ്വാഗതം ചെയ്തത്. ഈ വീഡിയോ സോഷ്യൽ മീഡിയയിൽ വൈറലായി.
വിമാനത്തിന്‍റെ പ്രവേശന കവാടത്തിൽ അമ്മയുടെ അരികിലായി അദ്ദേഹം നിൽക്കുന്നത് കാണാൻ സാധിക്കും. ആദ്യമായിട്ടാണ് അമ്മ യാത്രക്കാരിയായിട്ടുള്ള വിമാനം താൻ പറത്തുന്നത് എന്ന് പൈലറ്റ് ജസ്വന്ത് പറയുന്നു. പൈലറ്റാവാൻ വേണ്ടി തനിക്ക് എല്ലാ പിന്തുണയും തന്നത് അമ്മയാണ് ആ സ്വപ്നം പൂർത്തീകരിക്കാൻ സഹായിച്ചത് അമ്മ ഉള്ളതിനാലാണെന്നും ജസ്വന്ത് പറഞ്ഞു.
‘ഒരു വിദൂര ഗ്രാമത്തിൽ നിന്നാണ് താൻ വരുന്നത്. ഒരു പൈലറ്റാവുക എന്നത് സങ്കല്പത്തിനും അപ്പുറത്തായിരുന്നു. ആ കഷ്ടപ്പാടുകളിലും ഉറക്കമില്ലാത്ത രാത്രികളിലും കൂട്ടിരുന്നത് അമ്മയാണ്. അമ്മയില്ലായിരുന്നെങ്കിൽ ഇത് സാധ്യമാവില്ലായിരുന്നു’ എന്നും ജസ്വന്ത് കൂട്ടിച്ചേർത്തു.
