മലപ്പുറം: ഐഎസ് ബന്ധത്തിന്റെ പേരില്‍ അന്വേഷണ ഏജന്‍സികള്‍ നടത്തുന്ന അന്വേഷണങ്ങള്‍ക്കു മുസ്‌ലിംലീഗിന്റെ പിന്തുണ ഉറപ്പുനല്‍കുന്നതായി പാര്‍ട്ടി സംസ്ഥാന ജനറല്‍ സെക്രട്ടറി കെ.പി.എ.മജീദ്. അതേസമയം, അറസ്റ്റും മറ്റു നടപടികളും യഥാര്‍ഥ കുറ്റവാളികള്‍ക്കെതിരെയാണെന്ന് ഉറപ്പുവരുത്തണമെന്നും കെ.പി.എ.മജീദ് പത്രക്കുറിപ്പില്‍ ആവശ്യപ്പെട്ടു. ഏതാനും ചില യുവാക്കളെങ്കിലും ഐഎസ് ആശയങ്ങളുമായി സമൂഹത്തില്‍ ഭീകരത സൃഷ്ടിക്കാന്‍ ഇറങ്ങി പുറപ്പെട്ടിട്ടുണ്ടെന്ന് മജീദ് പറഞ്ഞു.
ഇതു അപകടമാണ്. ഇതുവച്ചു പൊറുപ്പിക്കാനാകില്ല. അറസ്റ്റും നടപടികളും യഥാര്‍ഥ കുറ്റവാളികള്‍ക്കുനേരെ മാത്രമേ നടക്കുന്നുവെന്നുള്ളത് ഭരണകൂടം ഉറപ്പാക്കണം. ഐഎസ് ഭീകരരുടെ അപകടം തിരിച്ചറിഞ്ഞു വര്‍ഷങ്ങള്‍ക്കുമുമ്പുതന്നെ അതിനെ തള്ളിക്കളഞ്ഞവരാണ് കേരളത്തിലെ മുസ്‌ലിംലീഗും മറ്റു മുസ്‌ലിം മതസംഘടനകളും. അവരെ വിശ്വാസത്തിലെടുത്തുകൊണ്ടുള്ള നടപടികള്‍ക്കുമാത്രമേ ആത്യന്തികമായി വിജയിക്കാനാകുകയുള്ളൂ. ഐഎസിന്റെ പേരിലുള്ള അറസ്റ്റും റെയ്ഡും പൊതൂസമൂഹത്തെ ബോധ്യപ്പെടുത്താനുള്ള ചുമതല അന്വേഷണ ഏജന്‍സികളും സര്‍ക്കാരും ഏറ്റെടുത്തേ മതിയാകൂ.
സമൂഹത്തില്‍ കടുത്ത സംശയവും ആശങ്കയും നിലനില്‍ക്കാന്‍ ഇടവരുത്തുന്ന നടപടികള്‍ ഉണ്ടാകരുത്. കേവലം സംശയത്തിന്റേയും നിക്ഷിപ്ത താത്പര്യങ്ങളുടെയും പേരിലുള്ള എല്ലാ നടപടികളും ഐഎസിനെതിരെയുള്ള പോരാട്ടത്തെ ദുര്‍ബലപ്പെടുത്തും. കേന്ദ്രസര്‍ക്കാരിന്റെ ഫാസിസ്റ്റ് ചെയ്തികള്‍ ഭയത്തിലാക്കിയ ന്യൂനപക്ഷ സമൂഹത്തെ ഐഎസ് ഭീഷണിയുടെ പേരില്‍ സംശയത്തിന്റെ നിഴലിലാക്കാനുള്ള നീക്കം അംഗീകരിക്കാനാകില്ല. ന്യൂനപക്ഷങ്ങളെ അന്യവത്ക്കരിക്കുന്ന അപകടകരമായ ചെയ്തികളില്‍നിന്നു സംഘ്പരിവാറും കേന്ദ്രസര്‍ക്കാരും മാറിനില്‍ക്കണം. ജനാധിപത്യ മതനിരപേക്ഷവാദികളെ വിശ്വാസത്തിലെടുത്ത് മാത്രമേ ഐഎസ് അടക്കമുള്ള ഛിദ്രശക്തികളെ നേരിടുന്നത് സാധ്യമാകൂ.
തീവ്രവാദ, ഭീകരവാദത്തിനെതിരായി ശക്തമായ നിലപാട് സ്വീകരിക്കുകയും അതിനെതിരെയുള്ള പ്രചാരണ പരിപാടികള്‍ നടത്തുകയും ചെയ്ത പാര്‍ട്ടിയാണ് മുസ്‌ലിം ലീഗ്. ഇക്കാര്യത്തില്‍ എല്ലാവരെയും സഹകരിപ്പിച്ച് പാര്‍ട്ടി ശക്തമായി മുന്നോട്ടുപോകുമെന്നുംമജീദ് പറഞ്ഞു. ഇന്നത്തെ ഈ സാഹചര്യത്തില്‍ എല്ലാ മതസംഘടനകളും അവരുടെ വേദികളിലും വെള്ളിയാഴ്ച നടക്കുന്ന ഉദ്‌ബോധനങ്ങളിലും ഇക്കാര്യത്തില്‍ സന്ദേശം നല്‍കണം. വിദ്യാഭ്യാസസമ്പന്നരായ ചെറുപ്പക്കാര്‍ ഫേസ് ബുക്കില്‍ വരുന്ന ചില സന്ദേശങ്ങളെ പിന്തുടര്‍ന്നു വഴിതെറ്റിപോകുന്നത് ജാഗ്രതയോടെ കൂടി കാണേണ്ടതുണ്ട്. മുസ്‌ലിം വിദ്യാര്‍ഥി യുവജന സംഘടനകള്‍ കാമ്പസിനകത്തും പുറത്തും ആവശ്യമായ ഇടപെടലുകള്‍ നടത്തണമെന്നും മജീദ് ആവശ്യപ്പെട്ടു.
