കൊച്ചി: നമ്മുടെ കുട്ടികള് സ്കൂളില് പോകുന്ന സമയത്തും തിരികെ വീട്ടിലേക്ക് പോരുമ്പോഴും റോഡിലൂടെ പോകുന്ന വാഹനങ്ങള് കൈ കാണിച്ച് ലിഫ്റ്റ് ചോദിക്കുന്നത് പതിവ് കാഴ്ചയാണ്.
എന്നാല് എല്ലാ ലിഫ്റ്റും സേഫ് അല്ലെന്നും ഇത് ചിലപ്പോള് അപകടത്തിലേക്ക് നയിച്ചേക്കാമെന്നുമാണ് പോലീസ് മുന്നറിയിപ്പ് നല്കുന്നത്. വാഹനം ഓടിക്കുന്നവര് എങ്ങനെയുള്ളവരാണ് എന്ന് അറിയാതെ അവര്ക്കൊപ്പം യാത്ര ചെയ്യുന്നത് ഒട്ടും സുരക്ഷിതമല്ലെന്നാണ് സ്കൂള് വിദ്യാര്ഥികള് മനസിലാക്കേണ്ടത്.
ചില യാത്ര അപകടത്തിലേക്കാകാം
വാഹനം ഓടിക്കുന്ന വ്യക്തിയുടെ സ്വഭാവം, പശ്ചാത്തലം എന്നിവ അറിയാത്ത സാഹചര്യത്തില് ലിഫ്റ്റ് വാങ്ങിയുള്ള യാത്ര അപകടത്തില് കലാശിക്കാനുള്ള സാധ്യത ഏറെയാണ്.
അമിത വേഗത്തില് വാഹനം ഓടിക്കുന്നവര് ആണെങ്കില് അവര്ക്കു പിന്നീല് ഹെല്മറ്റ് ധരിക്കാതെയുള്ള യാത്ര അപകട സാധ്യത ഇരട്ടിയാക്കുന്നു. അശ്രദ്ധമായി വാഹനം ഓടിക്കുന്നവരും മദ്യപിച്ച് വാഹനം ഓടിക്കുന്നവരും കുറവല്ല എന്നു കൂടി ഓര്ക്കണം. മയക്കുമരുന്ന് ഉപയോഗിക്കുന്നരുടെയും ലഹരി കടത്തുകാരുടെയോ വാഹനത്തിലായിരിക്കാം ഒരു പക്ഷേ നിങ്ങളുടെ കുഞ്ഞ് യാത്ര ചെയ്യുക.
കുട്ടികളെ തട്ടിക്കൊണ്ട് പോകുന്നവര്, കുട്ടികളോട് മോശമായി പെരുമാറുന്നവര്, മറ്റു ക്രിമിനല് പശ്ചാത്തലം ഉള്ളവര് എന്നിങ്ങനെ ലിഫ്റ്റ് ചോദിച്ച് പോകുമ്പോള് കുട്ടികള് നേരിടേണ്ടി വന്നേക്കാവുന്ന വിപത്തുകള് അനവധിയാണ്.
അതിനാല് അപരിചിതരോട് ലിഫ്റ്റ് ചോദിക്കുന്നത് ഒഴിവാക്കണമെന്നാണ് പോലീസ് പറയുന്നത്. ഇക്കാര്യങ്ങളില് മാതാപിതാക്കളും കുട്ടികളും ഒരുപോലെ ജാഗരൂകരാകണമെന്നാണ് പോലീസ് മുന്നറിയിപ്പിലുള്ളത്.
- സ്വന്തം ലേഖിക
