കൊച്ചി: യുട്യൂബര്‍ ഉണ്ണി വ്‌ളോഗ്‌സിനെ ജാതീയമായി അധിക്ഷേപിക്കുകയും വധഭീഷണി നടത്തുകയും ചെയ്ത സംഭവത്തില്‍ തുടരന്വേഷണത്തിനൊരുങ്ങി എളമക്കര പോലീസ്. സംഭവത്തില്‍ അന്വേഷണം നടത്താന്‍ ആലുവ മജിസ്‌ട്രേറ്റ് കോടതി ഇന്നലെ എളമക്കര പോലീസിന് നിര്‍ദേശിച്ചിരുന്നു.
ജനുവരി അഞ്ചിനായിരുന്നു ഉണ്ണി വ്‌ളോഗ്‌സിനെ ചലച്ചിത്ര സംവിധായകനായ അനീഷ് അന്‍വര്‍ ജാതീയമായി അധിക്ഷേപിക്കുകയും കൊല്ലുമെന്ന് ഭീഷണിപ്പെടുത്തുകയും ചെയ്തത്.
അനീഷ് അന്‍വര്‍ സംവിധാനം ചെയ്ത “രാസ്ത’ എന്ന സിനിമയെക്കുറിച്ച് അഭിപ്രായം പറഞ്ഞതാണ് അനീഷ് അന്‍വറിനെ പ്രകോപിപ്പിച്ചതെന്ന് പരാതിയില്‍ പറയുന്നു.
സംഭവത്തില്‍ ഉണ്ണി വ്‌ളോഗ്‌സ് പോലീസില്‍ പരാതിപ്പെട്ടിരുന്നെങ്കിലും നടപടിയൊന്നുമുണ്ടായില്ല. തുടര്‍ന്നാണ് അദ്ദേഹം ആലുവ മജിസ്‌ട്രേറ്റ് കോടതിയെ സമീപിച്ചത്.
കേസിന്‍റെ ഗൗരവം മനസിലാക്കിയ ആലുവ മജിസ്‌ട്രേറ്റ് ടി.കെ. സന്തോഷ് അന്വേഷണം നടത്താന്‍ എളമക്കര പോലീസിന് നിര്‍ദേശം നല്‍കുകയായിരുന്നു.
സര്‍ജാനോ ഖാലിദിനെ നായകനാക്കി അനീഷ് അന്‍വര്‍ സംവിധാനം ചെയ്ത രാസ്ത എന്ന ചിത്രത്തിന്‍റെ റിലീസ് ജനുവരി അഞ്ചിനായിരുന്നു. അതേദിവസം തന്നെ ഉണ്ണി വ്‌ളോഗ്‌സ് സിനിഫൈല്‍ എന്ന യുട്യൂബ് ചാനലിലൂടെ റിവ്യൂവും നടത്തിയിരുന്നു.
സംവിധായകന്‍ അനീഷ് അന്‍വര്‍ തന്നെ ഫോണില്‍ വിളിച്ചതിന്‍റെ ഓഡിയോ റെക്കോര്‍ഡ് പിറ്റേന്ന് ഉണ്ണി തന്‍റെ യുട്യൂബ് ചാനലിലൂടെത്തന്നെ പുറത്തുവിട്ടിരുന്നു.
