പത്തനാപുരം:കൊറോണ വൈറസ് ഭീതി;യാത്രക്കാരില്ലാതെ കെ എസ് ആര്‍ ടി സി.കൊറോണ രോഗഭീതിയെ തുടര്‍ന്ന് യാത്രക്കാര്‍ പൊതുഗതാഗത സംവിധാനങ്ങളെ ഉപേക്ഷിച്ച നിലയില്‍.ഇതോടെ പത്തനാപുരം കെ എസ് ആര്‍ ടി സി ഡിപ്പോയില്‍ വരുമാനം മൂന്നിലൊന്നായി കുറഞ്ഞു.
ദീര്‍ഘദൂര സര്‍വീസുകളിലും,ടൗണ്‍ ടു ടൗണ്‍ ചെയിന്‍ സര്‍വീസുകളിലും യാത്രക്കാര്‍ ഇല്ലാത്ത സ്ഥിതിയാണ്.മലയോര ഗ്രാമീണ മേഖലകളിലേക്കു നടത്തുന്ന സര്‍വീസുകളിലും യാത്രക്കാരുടെ എണ്ണം തീരെ കുറവാണ്.
പതിനായിരം രൂപ വരെ വരുമാനം ലഭിച്ചിരുന്ന സര്‍വീസുകളില്‍ നിന്നും മൂവായിരത്തില്‍ താഴെ മാത്രമാണ് നിലവില്‍ ലഭിക്കുന്നത്.ഇതോടെ സര്‍വീസുകള്‍ പലതും നിര്‍ത്തി വയ്ക്കേണ്ട അവസ്ഥയിലാണ് കെ എസ് ആര്‍ ടി സി അധികൃതര്‍.
ചില റൂട്ടുകളില്‍ നിന്നും ഡീസല്‍ ചാര്‍ജ് പോലും ലഭിക്കാത്ത സ്ഥിതിയാണെന്നും അധികൃതര്‍ പറയുന്നു. വിദ്യാഭ്യാസ സ്ഥാപനങ്ങള്‍ അടച്ചിട്ടതും പ്രതികൂലമായി ബാധിച്ചിട്ടുണ്ട്.രോഗഭീതിയെ തുടര്‍ന്ന് നിര്‍മ്മാണ മേഖലയിലും,മറ്റ് തൊഴില്‍ സ്ഥാപനങ്ങളിലും തൊഴില്‍ സ്തംഭനമുണ്ടായതും കെ എസ് ആര്‍ ടി സിയെയാണ് കാര്യമായി ബാധിച്ചത്.
മിക്ക ബസുകളും കാലിയായി സര്‍വീസ് നടത്തേണ്ട സ്ഥിതിയാണ്.വരും ദിവസങ്ങളിലും തല്‍സ്ഥിതി തുടരുകയാണെങ്കില്‍ സര്‍വീസുകള്‍ പലതും വെട്ടിച്ചുരുക്കേണ്ടി വരുമെന്നും അധികൃതര്‍ പറയുന്നു.
