ഗുരുവായൂര്‍: സിയാച്ചിനിലെ മഞ്ഞുമലയില്‍ വീരമൃത്യു വരിച്ച ലാന്‍സ്‌നായിക് കൊല്ലം മണ്‍റോത്തുരുത്ത് കൊച്ചിടുക്കത്ത് വീട്ടില്‍ സുധീഷിന്റെ മകള്‍ ഏഴുമാസം പ്രായമുള്ള മീനാക്ഷിയുടെ ചോറുകൊടുക്കാന്‍ സുരേഷ് ഗോപി എംപി ഗുരുവായൂരിലെത്തി. ഇന്നലെ രാവിലെ പത്തരയോടെയായിരുന്നു മീനാക്ഷിയുടെ ചോറൂണ്‍ വഴിപാട്. ക്ഷേത്ര ദര്‍ശനത്തിനു ശേഷം ചോറൂണ്‍ ഹാളിലെത്തിയ സുരേഷ് ഗോപിയുടെ മടിയിലിരുത്തിയാണ് മീനാക്ഷിക്കു ചോറുകൊടുത്തത്.
സുധീഷ് മരിച്ചപ്പോള്‍ വീട്ടിലെത്തിയ സുരേഷ് ഗോപി മീനാക്ഷിയുടെ ചോറൂണിന് എത്തുമെന്നു പറഞ്ഞിരുന്നു. ഫെബ്രുവരി മൂന്നിനാണ് സിയാച്ചിനിലുണ്ടായ അപകടത്തില്‍ സുധീഷ് മരിച്ചത്. മകള്‍ മീനാക്ഷിയെ കാണാനാകാതെയാണ് സുധീഷ് മഞ്ഞുമലയില്‍ വീരമൃത്യു വരിച്ചത്.
മീനാക്ഷിയുടെ അമ്മ സാലു, സാലുവിന്റെ മാതാപിതാക്കളായ സജീവന്‍, പ്രീജ, സുധീഷിന്റെ മാതാപിതാക്കാളായ ബ്രഹ്മപുത്രന്‍, പുഷ്പവല്ലി എന്നിവരും ബന്ധുക്കളും ചോറൂണ്‍ വഴിപാടിനായി ഗുരുവായൂരിലെത്തിയിരുന്നു. ചോറൂണിനുശേഷം ശ്രീവത്സം ഗസ്റ്റ് ഹൗസിലെത്തിയ സുരേഷ് ഗോപി മീനാക്ഷിയെ കളിപ്പിച്ച് ബന്ധുക്കള്‍ക്കൊപ്പം കുറച്ചുസമയം ചെലവഴിച്ചശേഷമാണ് മടങ്ങിയത്. ദേവസ്വം ഭരണസമിതി അംഗം കെ.കുഞ്ഞുണ്ണി സുരേഷ് ഗോപിയെ സ്വീകരിച്ചു.
