കൊച്ചി: സ്ത്രീകളുടെ അവകാശങ്ങള്‍ ആരുടെയും ഔദാര്യമല്ലെന്നും അതു തിരിച്ചറിഞ്ഞ് നേടിയെടുക്കാന്‍ കൂട്ടായ പരിശ്രമം ആവശ്യമാണെന്നും ആദിവാസി ഗോത്രമഹാസഭാ ചെയര്‍പേഴ്‌സണ്‍ സി.കെ. ജാനു.വരാപ്പുഴ അതിരൂപതയുടെ സാമൂഹ്യ സേവന വിഭാഗമായ എറണാകുളം സോഷ്യല്‍ സര്‍വീസ് സൊസൈറ്റിയുടെ അന്തര്‍ദേശീയ വനിതാ ദിനാഘോഷം (ഉണര്‍വ്-2016) ഉദ്ഘാടനം ചെയ്യുകയായിരുന്നു അവര്‍.
ഉത്തരവാദിത്വങ്ങളില്‍ നിന്ന് ഒളിച്ചോടാതെ അവ സത്യസന്ധതയോടെ ഏറ്റെടുത്തു സമുഹത്തിനു സ്ത്രീകള്‍ മാത്യകയായി മാറണം. നല്ല സാമൂഹ്യ രാഷ്ട്രീയ അന്തരീക്ഷം സൃഷ്ടിക്കാന്‍ സ്ത്രീകള്‍ക്കാണു സാധിക്കുകയെന്നും അവര്‍ പറഞ്ഞു.
വരാപ്പുഴ അതിരൂപത വികാരി ജനറല്‍ മോണ്‍. ജോസഫ് പടിയാരംപറമ്പില്‍ അധ്യക്ഷത വഹിച്ചു. ഫാ. ആന്റണി റാഫേല്‍ കൊമരംചാത്ത് ഫാ. ജോബ് കുണേ്ടാണി, കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ ടാനി തോമസ്, കെആര്‍എല്‍സിസി വൈസ് പ്രസിഡന്റ് ഷാജി ജോര്‍ജ്, കൗണ്‍സിലര്‍ ഗ്രെയ്‌സി ബാബു ജേക്കബ്, പ്രോഗ്രാം കണ്‍വീനര്‍ ഷൈജ ബാബു, അനിത തോമസ്, ജാന്‍സി ജോര്‍ജ് എന്നിവര്‍ പ്രസംഗിച്ചു.
നേരത്തെ മറൈന്‍ ഡ്രൈവില്‍ നിന്നാരംഭിച്ച റാലി അതിരൂപത വികാരി ജനറല്‍ മോണ്‍. മാത്യു ഇലിഞ്ഞിമറ്റം ഫ്‌ളാഗ് ഓഫ് ചെയ്തു. മേഖലാ തലത്തില്‍ മികച്ച സ്ത്രീ സംരംഭകര്‍, മികച്ച നിശ്ചലദൃശ്യം, മികച്ച റാലി എന്നിവയ്ക്കുള്ള അവാര്‍ഡ് വിതരണം, ആശാകിരണം സമ്മാന കൂപ്പണ്‍ നറുക്കെടുപ്പ്, സ്‌നേഹകവചം പദ്ധതി ഉദ്ഘാടനം എന്നിവയും ഉണ്ടായിരുന്നു.
