കടുത്തുരുത്തി: നിയോജക മണ്ഡലത്തിലെ മുഴുവന്‍ ഗാര്‍ഹിക ഉപഭോക്താക്കള്‍ക്കും 2017 മാര്‍ച്ച് 31 ന് മുമ്പായി വൈദ്യുതി ലഭ്യമാക്കാന്‍ നടപടികള്‍ പുരോഗമിക്കുന്നതായി മോന്‍സ് ജോസഫ് എംഎല്‍എ. സംസ്ഥാന സര്‍ക്കാരും വൈദ്യുതി ബോര്‍ഡും പ്രഖ്യാപിച്ചിരിക്കുന്ന സമ്പൂര്‍ണ വൈദ്യുതീകരണ പരിപാടി ഫലപ്രദമായി നടപ്പാക്കുന്നതിന് കടുത്തുരുത്തി നിയോജകമണ്ഡലത്തില്‍ പദ്ധതി ആവിഷ്കരിച്ചതായി മോന്‍സ് ജോസഫ് എംഎല്‍എ അറിയിച്ചു.
ബിപിഎല്‍ ഭവനങ്ങള്‍ക്ക് വെതര്‍പ്രൂഫ് കണക്ഷന്‍ സൗജന്യമായി നല്‍കും. ബിപിഎല്‍ അല്ലാത്ത ഉപഭോക്താക്കള്‍ വെതര്‍ പ്രൂഫ് കണക്ഷനുള്ള എസ്റ്റിമേറ്റ് തുക സ്വന്തമായി വഹിക്കണം. പദ്ധതിയുടെ ഭാഗമായി വൈദ്യുതി വിതരണ ശൃംഖല വ്യാപിപ്പിക്കുന്നതിനും വോള്‍ട്ടേജ് ക്ഷാമം പരിഹരിക്കുന്നതിനും കൂടുതല്‍ കണക്ഷന്‍ നല്‍കുന്നതിനുമായി പുതിയ ട്രാന്‍സ്‌ഫോര്‍മര്‍ സ്ഥാപിക്കുന്നതിനും നടപടി സ്വീകരിക്കുമെന്ന് എംഎല്‍എ പറഞ്ഞു.
സമ്പൂര്‍ണ വൈദ്യുതീകരണ പദ്ധതി നടപ്പാക്കുന്നതു സംബന്ധിച്ച് ചര്‍ച്ച ചെയ്യാന്‍ കടുത്തുരുത്തി നിയോജകമണ്ഡലാടിസ്ഥാനത്തില്‍ പ്രത്യേക യോഗം എംഎല്‍എ വിളിച്ചു ചേര്‍ത്തിരുന്നു. പദ്ധതി നടപ്പാക്കാന്‍ തദേശ സ്വയംഭരണ സ്ഥാപനങ്ങള്‍ പദ്ധതി വിഹിതം പരമാവധി അനുവദിക്കണമെന്നുള്ള സര്‍ക്കാര്‍ നിര്‍ദേശം യോഗം ചര്‍ച്ച ചെയ്തു. കടുത്തുരുത്തി നിയോജകമണ്ഡലം പരിധിയില്‍ വരുന്ന കടുത്തുരുത്തി, ഉഴവൂര്‍ ബ്ലോക്കുകളും കെഎസ്ഇബിയുടെ സെക്ഷനുകളായ കിടങ്ങൂര്‍, നീണ്ടൂര്‍, ഏറ്റുമാ നൂര്‍, കുറുപ്പന്തറ, കുറവിലങ്ങാട്, പെരുവ, മരങ്ങാട്ടുപിള്ളി, രാമപുരം, തലയോലപ്പറമ്പ് എന്നിവയുടെ നേതൃത്വത്തിലും ഇനി കണക്ഷന്‍ ലഭിക്കാനുള്ള വീടുകളുടെ പുതിയ ലിസ്റ്റ് തയാറാക്കും.
കണക്ഷന്‍ ലഭിക്കുന്നതിനുള്ള തടസങ്ങള്‍ കാലതാമസം കൂടാതെ പരിഹരിക്കുന്നതിന് പ്രശ്‌ന പരിഹാര കമ്മറ്റിക്ക് രൂപം നല്‍കി. മോന്‍സ് ജോസഫ് എംഎല്‍എ ചെയര്‍മാനും കെഎസ്ഇബി എക്‌സിക്യൂട്ടീവ് എഞ്ചിനീയര്‍ ജനറല്‍ കണ്‍വീനറുമായുള്ള കമ്മിറ്റിയില്‍ എല്ലാ ജനപ്രതിനിധികളും പ്രധാന ഉദ്യോഗസ്ഥരും അംഗങ്ങളാണ്. കടുത്തുരുത്തി നിയോജകമണ്ഡലം സമ്പൂര്‍ണ വൈദ്യുതീകരണ വികസന യോഗത്തിന്റെ ഉദ്ഘാടനം മോന്‍സ് ജോസഫ് എംഎല്‍എ നിര്‍വഹിച്ചു.
ജില്ലാ പഞ്ചായത്ത് വൈസ് പ്രസിഡന്റ് മേരി സെബാസ്റ്റ്യന്‍ അധ്യക്ഷത വഹിച്ച യോഗത്തില്‍ ജില്ലാ പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍ സഖറിയാസ് കുതിരവേലി, ബ്ലോക്ക് പഞ്ചായത്ത് പ്രസിഡന്റ് ലൂസമ്മ ജയിംസ്, പഞ്ചായത്ത് പ്രസിഡന്റുമാരായ പി.വി. സുനില്‍, ലിസി എബ്രഹാം, സുജാത സുമോന്‍, ജോസ് പുത്തന്‍കാലാ, സെജി ഷാജു (കെഎസ്ഇബി), സി.വി. പ്രമോദ്, അന്നമ്മ രാജു, സി.എന്‍. സന്തോഷ്, ശോഭാ നാരായണന്‍, സൂസന്‍ ഗര്‍വാസീസ്, പി.ഡി. രാധാകൃഷ്ണന്‍, പി.എല്‍. എബ്രഹാം, നയന ബിജു, ജോര്‍ജ് ചെട്ടിയാശ്ശേരില്‍, തോമസ് പുളിക്കിയില്‍ എന്നിവര്‍ പ്രസംഗിച്ചു. കെഎസ്ഇബിയുടെ മുഴുവന്‍ എഞ്ചിനീയര്‍മാരും യോഗത്തില്‍ പങ്കെടുത്തു.
വൈദ്യുതി വകുപ്പു മന്ത്രി കടകംപള്ളി സുരേന്ദ്രനുമായി ചര്‍ച്ച ചെയ്ത് പദ്ധതിയുടെ തുടര്‍ നടപടികള്‍ സ്വീകരിക്കുമെന്ന് എംഎല്‍എ അറിയിച്ചു. 2006-2011 കാലഘട്ടത്തില്‍ കടുത്തുരുത്തി അസംബ്ലി മണ്ഡലത്തില്‍ എംഎല്‍എ ഫണ്ട് വിനിയോഗിച്ചു സമ്പൂര്‍ണ വൈദ്യുതീകരണ മണ്ഡലമായി പ്രഖ്യാപിച്ചിരുന്നു. ആ കാലഘട്ടത്തില്‍ മുഴുവന്‍ കുടുംബങ്ങള്‍ക്കും പദ്ധതി ഏറ്റവും പ്രയോജനകരമായി നടപ്പാക്കാന്‍ കഴിഞ്ഞിരുന്നു. ഇക്കുറിയും സര്‍ക്കാര്‍ സഹായത്തോടെ പദ്ധതി വിജയകരമായി നടപ്പാക്കുമെന്ന് മോന്‍സ് ജോസഫ് അറിയിച്ചു.
