മോസ്‌കോ: തെക്കുപടിഞ്ഞാറന്‍ റഷ്യയില്‍ ഫ്‌ളൈ ദുബായ് യാത്രാവിമാനം വിമാനത്താവളത്തില്‍ തകര്‍ന്നുവീണ് 61 പേര്‍ മരിച്ചു. പ്രദേശിക സമയം ശനിയാഴ്ച പുലര്‍ച്ചെ 3.50ന് (ഇന്ത്യന്‍ സമയം പുലര്‍ച്ചെ 5.01) റോസ്‌തോവ് ഓണ്‍ ഡോണ്‍ വിമാനത്താവളത്തില്‍ ലാന്‍ഡിംഗിനിടെയാണ് അപകടം. ദുബായിയില്‍നിന്നു എത്തിയതായിരുന്നു വിമാനം.
ഫ്‌ളൈ ദുബായ് വിമാന കമ്പനിയുടെ എഫ്.ഇസെഡ് ബോയിംഗ് 738 വിമാനമാണ് അപകടത്തില്‍പ്പെട്ടത്. കാലാവസ്ഥ വ്യതിയാനം മൂലം റണ്‍വേ കാണാന്‍ സാധിക്കാത്തിരുന്നതാണ് വന്‍ അപകടത്തിനു വഴിവച്ചത്. ലാന്‍ഡിംഗിനെ വിമാനത്തിന് തീപിടിച്ചത് ദുരന്തത്തിന്റെ ആക്കം കൂട്ടി. വിമാനത്തിലുണ്ടായിരുന്ന എല്ലാവരും കൊല്ലപ്പെട്ടതായി റീജിയണല്‍ എമര്‍ജന്‍സി മന്ത്രാലയം അറിയിച്ചു. ഇതില്‍ ആറുപേര്‍ വിമാനജീവനക്കാരാണ്. യുക്രെയ്ന്‍ അതിര്‍ത്തിയില്‍നിന്നു 115 കിലോമീറ്റര്‍ കിഴക്കാണ് റോസ്‌തോവ് വിമാനത്താവളം.
