മുംബൈ: ദാവൂദ് ഇബ്രാഹിമിന്റെ സഹോദരീപുത്രന്റെ വിവാഹത്തിന് വന്‍ സുരക്ഷയൊരുക്കി പോലീസ്. വിവാഹത്തിന്റെ വേദിയിലോ പരിസരത്തോ അധോലോക സംഘങ്ങള്‍ തമ്മില്‍ ഏറ്റുമുട്ടല്‍ നടന്നേക്കാമെന്ന റിപ്പോര്‍ട്ടിനെത്തുടര്‍ന്നാണ് പോലീസ് നടപടി. എന്നാല്‍, ദാവൂദിന്റെ കൂട്ടാളികള്‍ ഇവിടെയെത്തുമെന്ന വിവരത്തെത്തുടര്‍ന്ന് മുംബൈ ക്രൈംബ്രാഞ്ചും ജാഗരൂകരാണ്.
ഇതിനിടെ പാക്കിസ്ഥാനില്‍ ഒളിവില്‍ കഴിയുന്ന അധോലോക നായകന്‍ ദാവൂദ് ഇബ്രാഹിം മുംബൈയിലുള്ള തന്റെ സഹോദരീപുത്രന്റെ വിവാഹം സ്‌കൈപ്പ് വഴി പാക്കിസ്ഥാനിലിരുന്നു കാണുമെന്നു റിപ്പോര്‍ട്ട് ഉണ്ട്. സഹോദരി ഹസനീന പാര്‍ക്കറുടെ ഇളയ മകന്‍ അലി ഷാ പാര്‍ക്കറിന്റെ വിവാഹമാണ് ഇന്ന്. ഐഷ നാഗനിയാണു വധു. സൗത്ത് മുംബൈ നാഗ്പദയിലെ മോസ്കിലാണു വിവാഹച്ചടങ്ങുകള്‍. തുടര്‍ന്നു ജുഹുവിലെ ടുലിപ് സ്റ്റാര്‍ ഹോട്ടലില്‍ സല്‍ക്കാരം നടക്കും.—കറാച്ചിയില്‍ ഒളിവില്‍ കഴിയുന്ന ദാവൂദിനു ചടങ്ങുകള്‍ കാണുന്നതിനു പ്രത്യേകം ഇന്റര്‍നെറ്റ് സൗകര്യമൊരുക്കിയിട്ടുണ്ട്. ഹസീനയുടെ മറ്റൊരു മകന്‍ 2006ല്‍ കാര്‍ അപകടത്തില്‍ മരിച്ചു. ഹസീന 2014ലാണു മരിച്ചത്.
