മുക്കം: ഹൈക്കോടതിയുടെയും സംസ്ഥാന സര്‍ക്കാരിന്റെയും കര്‍ശന നിര്‍ദേശങ്ങള്‍ ഉണ്ടായിട്ടും സ്കൂള്‍ സമയങ്ങളില്‍ സര്‍വീസ് നടത്തുന്ന ടിപ്പര്‍ ലോറികള്‍ക്ക് മുക്കം പോലീസ് പിഴ ചുമത്തി. പോലീസ് സ്റ്റേഷന്‍ പരിസരത്താണ് വാഹനങ്ങള്‍ തടഞ്ഞ പിഴയിട്ടത്. കൊടുവള്ളി സിഐ ബിശ്വാസിന്റെ നിര്‍ദേശപ്രകാരമായിരുന്നു നടപടി.എസ്‌ഐ അബ്ദുറഹിമാന്റെ നേതൃത്വത്തിലായിരുന്നു വാഹനങ്ങള്‍ തടഞ്ഞത്.
രാവിലെ 8.30 മുതല്‍ 10വരെയും വൈകുന്നേകം 3.30 മുതല്‍ അഞ്ചു വരെയും ടിപ്പറുകള്‍ സര്‍വീസ് നടത്തുന്നത് തടഞ്ഞ് ഹൈക്കോടതിയും ഒമ്പതു മുതല്‍ പത്തുവരെയും നാലു മുതല്‍ അഞ്ചു വരെയും സര്‍വീസ് നടത്തുന്നത് തടഞ്ഞ് സംസ്ഥാന സര്‍ക്കാര്‍ ഉത്തരവും നിലനില്‍ക്കേയാണ് മലയോര മേഖലയില്‍ ഇവയെല്ലാം കാറ്റില്‍ പറത്തി ടിപ്പര്‍ ലോറികള്‍ മരണപാച്ചില്‍ നടത്തുന്നത്.
കഴിഞ്ഞ രമ്ടു മാസത്തിനിടയില്‍ മാത്രം നടന്ന പത്തോളം ടിപ്പര്‍ അപകടങ്ങളില്‍ മൂന്നു പേര്‍ മരിച്ചിരുന്നു. ഗുരുതരമായി പരിക്കേറ്റവര്‍ നിരവധിയാണ്. ഈ അവസ്ഥയില്‍ നാട്ടുകാരുടെ പരാതികള്‍ നിരന്തരം വന്നുകൊണ്ടിരിക്കുന്ന അവസ്ഥയിലാണ് മുക്കം എസ്‌ഐഇ.കെ. അബ്ദുറഹിമാന്‍, എഎസ്‌ഐ സി.പി. ബാലകൃഷ്ണന്‍ എന്നിവരുടെ നേതൃത്വത്തില്‍ ടിപ്പറുകള്‍ തടഞ്ഞത്. ഒരു മണിക്കൂറിനിടെ തന്നെ 11 വണ്ടികള്‍ക്ക് പിഴയിട്ടു. ഇതോടെ മറ്റ് ടിപ്പറുകള്‍ സര്‍വീസ് നിര്‍ത്തിവയ്ക്കുകയായിരുന്നു.
നേരത്തെ പരാതി നല്‍കിയിട്ടും നടപടിയില്ലാത്ത സാഹചര്യത്തില്‍ മലയോര മേഖലയില്‍ വിവിധയിടങ്ങളില്‍ നാട്ടുകാര്‍ ടിപ്പറുകള്‍ തടഞ്ഞിരുന്നു. ഇത് നാട്ടുകാരും ടിപ്പര്‍ ജീവനക്കാരും തമ്മില്‍ സംഘര്‍ഷത്തിനും കാരണമായിരുന്നു. ഇതേ തുടര്‍ന്നാണ് പോലീസ് നടപടി ശക്തമാക്കിയത്.
