കൊച്ചി: സംസ്ഥാനത്ത് സ്വര്‍ണവിലയില്‍ വന്‍ മുന്നേറ്റം. ഇന്ന് ഗ്രാമിന് 250 രൂപയും പവന് 2,000 രൂപയുമാണ് വര്‍ധിച്ചത്. ഇതോടെ സ്വര്‍ണവില ഗ്രാമിന് 9,025 രൂപയും പവന് 7,2200 രൂപയുമായി. അന്താരാഷ്ട്ര സ്വര്‍ണവില ഏപ്രില്‍ 22ന് ട്രോയ് ഔണ്‍സിന് 3,500 ഡോളറിലേക്ക് എത്തിയിരുന്നു. കഴിഞ്ഞ രണ്ടാഴ്ചയായി സ്വര്‍ണവിലയില്‍ ട്രോയ് ഔണ്‍സിന് 250 ഡോളറിന്റെ കുറവ് രേഖപ്പെടുത്തിയിരുന്നു. അതിനുശേഷം നേരിയ മുന്നേറ്റത്തോടെ തുടങ്ങിയ വിലവര്‍ധന ട്രോയ് ഔണ്‍സിന് 105 ഡോളര്‍ വര്‍ധനവാണ് ഇന്ന് രേഖപ്പെടുത്തിയത്.
ഇന്നലെ രാവിലെ സ്വര്‍ണവില നിശ്ചയിക്കുമ്പോള്‍ ട്രോയ് ഔണ്‍സിന് 3257 ഡോളര്‍ ആയിരുന്നു അന്താരാഷ്ട്ര സ്വര്‍ണവില. ഇന്ന് അത് ട്രോയ് ഔണ്‍സിന് 3362 ഡോളറിലെത്തി. കഴിഞ്ഞ രണ്ടാഴ്ചയ്ക്കിടെ ലോകത്ത് പല രാജ്യങ്ങള്‍ തമ്മിലുമുള്ള അസ്വസ്ഥതകള്‍ സംഘര്‍ഷത്തിലേക്ക് നീങ്ങുന്നത് സ്വര്‍ണവില ഉയരുന്നതിന് കാരണമായിട്ടുണ്ട്.
ട്രോയ് ഔണ്‍സിന് 3500 ഡോളറില്‍ എത്തിയപ്പോള്‍ സ്വര്‍ണത്തിന്‍റെ ഏറ്റവും വലിയ വര്‍ധനയാണ് ഇതെന്നും ഇനി മുകളിലോട്ട് പോകാനുള്ള സാധ്യതയില്ലെന്നും പ്രവചനമുണ്ടായിരുന്നു. ഇപ്പോഴത്തെ ട്രെന്‍ഡ് സ്വര്‍ണവില ഇതേ രീതിയില്‍ മുന്നോട്ടു നീങ്ങിയാല്‍ ട്രോയ് ഔണ്‍സിന് 3500 ഡോളര്‍ കടന്നു മുന്നോട്ടു പോകുമെന്നാണ് ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍ സംസ്ഥാന ജനറല്‍ സെക്രട്ടറി അഡ്വ. എസ്. അബ്ദുല്‍ നാസര്‍ പറഞ്ഞു. കേരളത്തില്‍ അക്ഷയ തൃതീയയ്ക്കുശേഷം സ്വര്‍ണ വ്യാപാരം മെച്ചപ്പെടുന്നതിനിടയാണ് ഈ വില വര്‍ധന ഉണ്ടായിട്ടുള്ളത്.
സ്വന്തം ലേഖിക
