കൊച്ചി: ജാനകി വേര്‍സസ് സ്‌റ്റേറ്റ് ഓഫ് കേരള സിനിമയിലെ സെന്‍സര്‍ ബോര്‍ഡ് ഇടപെടലില്‍ വ്യക്തത തേടി നിര്‍മാതാക്കള്‍ സമര്‍പ്പിച്ച ഹര്‍ജി ഹൈക്കോടതി ഇന്ന് പരിഗണിക്കും. ജസ്റ്റിസ് എന്‍. നഗരേഷിന്‍റെ ബെഞ്ചാണ് ഹര്‍ജി പരിഗണിക്കുക.
പേരുമാറ്റം നിര്‍ദേശിച്ചത് എന്ത് കാരണത്താലാണ് എന്നതില്‍ സെന്‍സര്‍ ബോര്‍ഡ് വ്യക്തത വരുത്തണമെന്നാണ് ആവശ്യം. നിലവില്‍ പേരുമാറ്റാന്‍ ഉദ്ദേശിക്കുന്നില്ലെന്നും നിയമപരമായി മുന്നോട്ടുപോകുമെന്നുമാണ് സുരേഷ് ഗോപി ചിത്രത്തിന്‍റെ അണിയറക്കാരായ സിനിമാ പ്രവര്‍ത്തകര്‍ അറിയിച്ചിരിക്കുന്നത്. വ്യാഴാഴ്ച മുംബൈയില്‍ ചേരുന്ന റിവ്യൂ കമ്മിറ്റി ചിത്രം കാണും. ശേഷം അനുകൂല തീരുമാനം ഉണ്ടാകുമെന്ന പ്രതീക്ഷയിലാണ് അണിയറ പ്രവര്‍ത്തകര്‍.
സര്‍ട്ടിഫിക്കറ്റ് നല്‍കാതിരുന്നതിന് സെന്‍സര്‍ ബോര്‍ഡ്: കാരണം വ്യക്തമാക്കിയിട്ടില്ല: ജെഎസ്‌കെ സംവിധായകന്‍
കാരണം വ്യക്തമാക്കാതെയാണ് സിനിമയ്ക്ക് സെന്‍സര്‍ ബോര്‍ഡ് സര്‍ട്ടിഫിക്കറ്റ് നല്‍കാത്തതെന്ന് ജാനകി വേഴ്‌സസ് സ്‌റ്റേറ്റ് ഓഫ് കേരളയുടെ സംവിധായകന്‍ പ്രവീണ്‍ നാരായണന്‍. വാക്കാല്‍ മാത്രമാണ് സിനിമയുടെ പേര് മാറ്റണമെന്ന് അറിയിച്ചിട്ടുള്ളത്. മുംബൈയില്‍നിന്നാണ് ഇക്കാര്യത്തില്‍ ഒരു തടസം നേരിടുന്നത്.
സിനിമ കാണാതെയാണോ ബോര്‍ഡ് ഇങ്ങനെ ഒരു നിലപാട് എടുത്തതെന്ന സംശയമുണ്ട്. സിനിമയിലെ പ്രധാന കഥാപാത്രമായ സുരേഷ് ഗോപി ഇടപെടല്‍ നടത്തുന്നുണ്ടെന്നും റിവ്യൂ കമ്മിറ്റിയില്‍ നിന്ന് അനുകൂലമായ തീരുമാനം ഉണ്ടാകുമെന്നാണ് പ്രതീക്ഷയെന്നും പ്രവീണ്‍ നാരായണന്‍ സ്വകാര്യ ചാനലിനു നല്‍കിയ അഭിമുഖത്തില്‍ പറഞ്ഞു.
ജാനകി എന്ന പേര് സിനിമയില്‍ നിന്നും മാറ്റണമെന്നാണ് സെന്‍സര്‍ ബോര്‍ഡ് അണിയറ പ്രവര്‍ത്തകരോട് ആവശ്യപ്പെട്ടത്. ജാനകി എന്നത് ഹൈന്ദവ ദൈവത്തിന്‍റെ പേരാണെന്നും പേര് മാറ്റണമെന്നുമാണ് സെന്‍സര്‍ ബോര്‍ഡ് മുന്നോട്ട് വച്ച നിര്‍ദ്ദേശം എന്നുമാണ് റിപ്പോര്‍ട്ട്. ജൂണ്‍ 27ന് സിനിമ റിലീസ് ചെയ്യാനിരിക്കെയാണ് റിലീസ് അനുമതി നിഷേധിച്ചത്.
