ബോളിവുഡിലാണ് തുടക്കമെങ്കിലും നടി ജെനീലിയ ഡിസൂസയെ താരമായി വളർത്തിയത് തമിഴ്, തെലുങ്ക് സിനിമാ ലോകമാണ്. ക്യൂട്ട് ഗേൾ ഇമേജിൽ വളരെ പെട്ടെന്ന് ജെനീലിയക്ക് ജനശ്രദ്ധ നേടാനായി. ഒന്നിന് പിറകെ ഒന്നായി നടിക്ക് തെലുങ്കിൽനിന്നു ഹിറ്റുകൾ ലഭിച്ചു. തമിഴിലും ഈ വിജയഗാഥ തുടർന്നു. ഹിന്ദിയിൽ ചുരുക്കം സിനിമകളേ ജെനീലിയ ചെയ്തിട്ടുള്ളൂ. ഇവയിൽ കാര്യമായി ശ്രദ്ധിക്കപ്പെട്ട സിനിമകളും കുറവാണ്.
എന്തുകൊണ്ടാണ് ജെനീലിയക്ക് ബോളിവുഡിൽ ശ്രദ്ധിക്കപ്പെടാൻ പറ്റാതെ പോയെന്ന ചർച്ചകൾ പലപ്പോഴും നടന്നിട്ടുണ്ട്. നെപ്പോട്ടിസം (സ്വജനപക്ഷപാത്രം) കൊടികുത്തി വാഴുന്ന ബി ടൗണിൽ തന്‍റേതായ സ്ഥാനം കണ്ടെത്തുക ജെനീലിയക്ക് എളുപ്പമായിരുന്നില്ല. എന്നാൽ തെന്നിന്ത്യയിൽനിന്നു തുടരെ അവസരങ്ങൾ വരികയും ചെയ്തു.
ജെനീലിയ നായികയായി 2008 ൽ പുറത്തിറങ്ങിയ തെലുങ്ക് ചിത്രമായിരുന്നു റെഡി. രാം പൊത്തിനേനി നായകനായെത്തിയ സിനിമ ഹിറ്റായിരുന്നു. ഇതേ പേരിൽ സിനിമ ഹിന്ദിയിലേക്ക് റീമേക്ക് ചെയ്യുകയും ചെയ്തു. സൽമാൻ ഖാനായിരുന്നു നായകൻ. നായികയായി തനിക്ക് അവസരം ലഭിക്കുമെന്ന് ജെനീലിയ പ്രതീക്ഷിച്ചിരുന്നു. എന്നാൽ നടി അസിനെയാണ് സൽമാൻ ഖാൻ നായികയാക്കിയത്. അന്ന് ഗജിനിയുടെ വിജയത്തിളക്കത്തിലായിരുന്നു അസിൻ. റെഡി ഹിന്ദി റീമേക്കിൽ തനിക്ക് അവസരം ലഭിക്കാതിരുന്നതിനെക്കുറിച്ച് സംസാരിക്കുകയാണ് ജെനീലിയ ഇപ്പോൾ.
ഇതിന്‍റെ പേരിൽ തനിക്ക് വിഷമം തോന്നിയിട്ടില്ലെന്ന് ജെനീലിയ പറയുന്നു. അതേസമയം റീമേക്കിൽ നായികയാകാൻ തനിക്ക് താൽപര്യമുണ്ടായിരുന്നെന്നും ജെനീലിയ വ്യക്തമാക്കി. അത് ഞാൻ വളരെ സന്തോഷത്തോടെ ചെയ്യുമായിരുന്നു. കാരണം സൗത്തിലെ എന്‍റെ സിനിമയാണത്. ഞാൻ വളരെ ആസ്വദിച്ച് ചെയ്ത സിനിമയുമായിരുന്നു. ഭാവിയിൽ ഞാനും സൽമാൻ ഖാനും ഒരുമിച്ചെത്തുന്ന മറ്റൊരു സിനിമയ്ക്ക് വേണ്ടിയായിരിക്കും ഇത് നടക്കാതെ പോയത്- ജെനീലിയ വ്യക്തമാക്കി.
2012 ൽ വിവാഹിതയായശേഷം അഭിനയ രംഗത്ത് നിന്നു മാറിനിന്ന ജെനീലിയ വർഷങ്ങൾക്കിപ്പുറം വീണ്ടും കരിയറിൽ സജീവമാകുകയാണ്. സിതാരെ സമീൻ പർ ആണ് ജെനീലിയയുടെ പുതിയ സിനിമ. ആമിർ ഖാനാണ് നായകൻ. 2007 ൽ പുറത്തിറങ്ങിയ താരേ സമീൻ പർ എന്ന സിനിമയുടെ രണ്ടാം ഭാഗമാണിത്.
ആമിർ ഖാനായിരുന്നു അന്നും നായകൻ. നടൻ റിതേഷ് ദേശ്മുഖാണ് ജെനീലീയയുടെ ഭർത്താവ്. ഏറെക്കാലത്തെ പ്രണയത്തിനുശേഷമായിരുന്നു വിവാഹം. 2003 ൽ തുജെ മേരി കസം എന്ന സിനിമയിൽ റിതേഷും ജെനീലിയയും ഒരുമിച്ച് അഭിനയിച്ചിരുന്നു. ഈ സിനിമയ്ക്കിടെയാണ് ഇവർ അടുത്തത്. 2022 ൽ മിസ്റ്റർ മമ്മി എന്ന സിനിമയിലൂടെയാണ് ജെനീലിയ സിനിമാ രംഗത്തേക്ക് തിരിച്ചെത്തുന്നത്. റിതേഷ് ദേശ്മുഖായിരുന്നു നായകൻ. 2016 ൽ വിവാഹിതയായ ശേഷം അസിൻ അഭിനയ രംഗത്തുനിന്നു പൂർണമായും മാറി നിൽക്കുകയാണ്. രാഹുൽ ശർമ എന്നാണ് അസിന്‍റെ ഭർത്താവിന്‍റെ പേര്. അരിൻ എന്നാണ് മകളുടെ പേര്.
