തെന്നിന്ത്യൻ താരം തമന്നയുടെ കരിയറിലെ ഹിറ്റുകളിലൊന്നാണ് രാജമൗലിയുടെ ബ്ലോക്ബസ്റ്റർ ആക്ഷൻ ഫാന്‍റസി ചിത്രമായ ബാഹുബലി: ദി ബിഗിനിങ്‌. ചിത്രത്തില്‍ അവന്തിക എന്ന കഥാപാത്രത്തെയാണു തമന്ന അവതരിപ്പിച്ചത്.
ചിത്രത്തിലെ വിവാദമായ ഒരു രംഗത്തെക്കുറിച്ച് പ്രതികരിച്ചിരിക്കുകയാണു താരം. യോദ്ധാവും പ്രഭാസ് അവതരിപ്പിച്ച ശിവന്‍റെ പ്രണയിനിയുമായ അവന്തിക എന്ന കഥാപാത്രത്തെ, കാമറ ആംഗിളുകളിലൂടെയും കഥാപാത്രത്തിന്‍റെ ചില പെരുമാറ്റങ്ങളിലൂടെയും മോശമായി ചിത്രീകരിച്ചു എന്ന വിമർശനങ്ങൾ ഉയർന്നിരുന്നു. ഒരഭിമുഖത്തിലാണു സിനിമ ഇറങ്ങി പത്ത് വർഷങ്ങൾക്കുശേഷം തമന്ന ഈ വിമർശനങ്ങളോട് ഇക്കഴിഞ്ഞ ദിവസം പ്രതികരിച്ചത്.
മറ്റൊരാൾ തന്‍റെ നിയന്ത്രണ പരിധിയിൽ അല്ലെന്നു കാണുമ്പോൾ കുറ്റബോധവും നാണക്കേടും ഉപയോഗിച്ച് അത് നേടിയെടുക്കാൻ അവർ ശ്രമിക്കും. നാണംകെടുത്തുമ്പോൾ നിയന്ത്രണം ലഭിച്ചതുപോലെ അവർക്കുതോന്നും. – തമന്ന പറഞ്ഞു.
അവന്തികയുടെ കഥാപാത്രത്തെയും വിമർശനങ്ങൾ ഉണ്ടായ സീനിനേയും രാജമൗലി എങ്ങനെയാണു കണ്ടിരുന്നത് എന്നതിനേയും താരം പ്രശംസിക്കുന്നുണ്ട്. മനോഹരമായി സ്നേഹിക്കപ്പെടാൻ ആഗ്രഹിക്കുന്ന സ്ത്രീ എന്നാണ് അവന്തികയുടെ കഥാപാത്രത്തെ സർ എനിക്ക് വിശദീകരിച്ചു തന്നത്- തമന്ന പറയുന്നു.
ജീവിതത്തിൽ ഒരുപാടു യാതനകളിലൂടെ കടന്നുപോയിട്ടുള്ളതിനാൽ മറ്റുള്ളവർ തന്നെ ചൂഷണം ചെയ്യുമെന്നു വിശ്വസിക്കുന്ന ഒരു സ്ത്രീ. അതുകൊണ്ടുതന്നെ ബന്ധങ്ങളിൽ കൃത്യമായ അതിര് അവൾ സൂക്ഷിക്കുന്നു. എന്നാൽ, ഒരു യുവാവ് അവളെ പ്രണയിക്കാൻ ശ്രമിക്കുന്നു, അവളുടെ സൗന്ദര്യം അവനുമുന്നിൽ തുറന്നുകാട്ടുന്നു- അഭിമുഖത്തിൽ തമന്ന പറഞ്ഞു.
