നാദാപുരം: സഹപാഠിയെ ബൈക്കില്‍ കയറ്റി പാറക്കടവ് ടൗണിലിറക്കിയ വിദ്യാര്‍ഥിക്ക് നേരേ സാദാചാര പോലീസ് ചമഞ്ഞ് അക്രമം. കല്ലാച്ചി പാരലല്‍ കോളജ് വിദ്യാര്‍ഥി ഇരിങ്ങണ്ണൂര്‍ സ്വദേശി ശ്രീസാഗറി(19)നെയാണ് ഞായറാഴ്ച ബൈക്കിലെത്തിയ സംഘം അക്രമിച്ച് പരിക്കേല്‍പ്പിച്ചത്. കൂടെ പഠിക്കുന്ന വിദ്യാര്‍ഥിനിയുടെ സഹോദരിയുടെ വിവാഹത്തിന് ചെക്യാട്ടെ വിവാഹവീട്ടിലെത്തിയതായിരുന്നു ശ്രീസാഗര്‍. വിവാഹ ശേഷം സഹപാഠിയായ വിദ്യാര്‍ഥിനിക്ക് പെട്ടെന്ന് വീട്ടിലെത്തേണ്ടതിനാല്‍ ബൈക്കില്‍ പാറക്കടവ് ടാക്‌സി സ്റ്റാന്‍ഡില്‍ ഇറക്കുകയായിരുന്നു.
പെണ്‍കുട്ടിയെ സ്റ്റാന്‍ഡില്‍ ഇറക്കിയ ഉടനെ ബൈക്കിലെത്തിയ ഒരു സംഘം ശ്രീസാഗറിനെ തൊട്ടടുത്ത പറമ്പിലേക്ക് കൊണ്ട് പോയി മര്‍ദ്ദിക്കുകയും പിന്നീട് ആളൊഴിഞ്ഞ വീട്ടിലെത്തിച്ച് മര്‍ദ്ദിച്ച് അവശനാക്കുകയുമായിരുന്നു. നാട്ടുകാര്‍ പോലീസില്‍ വിവരമറിയിച്ചതിനെ തുടര്‍ന്ന് നാദാപുരം കണ്‍ട്രോള്‍ റൂം പോലീസ് സ്ഥലത്തെത്തി വിദ്യാര്‍ഥിയെ രക്ഷപ്പെടുത്തി. രണ്ടു പേരെ പോലീസ് കസ്റ്റഡിയിലെടുത്തിട്ടുണ്ട്. ഇവരെ ചോദ്യം ചെയ്ത് വരികയാണ്. പരിക്കേറ്റ വിദ്യാര്‍ഥിയെ പോലീസ് തലശേരി ഗവ ആശുപത്രിയില്‍ പ്രവേശിപ്പിച്ചു.
