കോട്ടയം: പാലാ കടപ്പാട്ടൂര്‍ മഹാദേവന്റെ അവതാര ചരിതം ഓട്ടന്‍തുള്ളലായി അരങ്ങിലെത്തുന്നു. പ്രശസ്ത തുള്ളല്‍ കലാകാരന്‍ പാലാ കെ.ആര്‍. മണിയാണ് കടപ്പാട്ടൂരപ്പന്റെ കഥ തുള്ളലായി ആദ്യമായി അരങ്ങിലെത്തിക്കുന്നത്. കടപ്പാട്ടുര്‍ ക്ഷേത്രത്തിലെ വിഗ്രഹ ദര്‍ശനദിനാഘോഷത്തിന്റെ ഭാഗമായി നാളെ ഉച്ചകഴിഞ്ഞ് 2.30ന് ദീപാരാധനയ്ക്കുശേഷമാണു ക്ഷേത്രസന്നിധിയില്‍ ഓട്ടന്‍തുള്ളല്‍ അവതരിപ്പിക്കുന്നത്.
കെ.ആര്‍. മണി തന്നെ എഴുതി വിഎന്‍എസ് വടക്കേമഠം മേവിട, പ്രഫ. ശ്രീലകം വേണുഗോപാല്‍ എന്നിവര്‍ ചിട്ടപ്പെടുത്തിയ കഥയ്ക്ക് കടപ്പാട്ടൂര്‍ പുരേഖ ചരിതം എന്നാണ് പേരിട്ടിരിക്കുന്നത്. കലാമണ്ഡലം പ്രഭാകരനാണ് ഓട്ടന്‍തുള്ളലിന്റെ സംവിധാനം നിര്‍വഹിച്ചിരിക്കുന്നത്. കേരളത്തിലെ വിവിധ ക്ഷേത്രങ്ങളില്‍ വര്‍ഷങ്ങളായി ഓട്ടന്‍തുള്ളല്‍ അവതരിപ്പിച്ചു വന്നിരുന്ന പാലാ കെ.ആര്‍. മണി വര്‍ഷങ്ങളായി കടപ്പാട്ടൂരില്‍ ദര്‍ശനത്തിനു പതിവായി പങ്കെടുക്കുന്ന ഭക്തനാണ്. അമ്പലത്തില്‍ നിന്നു കിട്ടിയ പുസ്തകത്തില്‍ കടപ്പാട്ടൂരപ്പന്റെ കഥ വായിച്ച മണി ഇത് ഓട്ടന്‍ തുള്ളലായി അവതരിപ്പിക്കാനായി കഥ എഴുതുകയായിരുന്നു.
അമ്പലത്തിന്റെ ചരിത്രം സംബന്ധിച്ച് നിരവധി പുസ്തകങ്ങള്‍ വായിച്ചു പഠിച്ചാണ് തുള്ളലിനായി കഥ എഴുതിയത്. തുടര്‍ന്ന് ക്ഷേത്രം ഭാരവാഹികളാണു കഥ തുള്ളലായി അവതരിപ്പിക്കാന്‍ അനുമതി നല്‍കിയത്. ‘കടപ്പാട്ടൂര്‍ പുരം തന്നില്‍ വിളങ്ങും ശ്രീ മഹാദേവന്‍… തിരുഅവതാരം ചെയ്തതറിഞ്ഞേ കഥാഭാഗം…’ എന്ന പ്രാരംഭ ഈരടികളോടെ തുടങ്ങുന്ന തുള്ളല്‍ 45 മിനിറ്റ് നീണ്ടുനില്കും. മരം വെട്ടിയപ്പോള്‍ വിഗ്രഹം കാണുന്നതു മുതല്‍ ഇന്നത്തെ കടപ്പാട്ടൂര്‍ ക്ഷേത്രത്തിന്റെ പുരോഗതിയും വളര്‍ച്ചയും വരെ കഥയിലുണ്ട്. കലാമണ്ഡലം പ്രഭാകരനും, നാരായണനുമാണ് പാട്ട് പാടുന്നത്. പ്രണവും രാകേഷ് മോഹന്‍ മൃദംഗവും കലാമണ്ഡലം പുരുഷന്‍ ഇടയ്ക്കയുമായി പിന്നണിയിലുണ്ട്.
പ്രശസ്ത തുള്ളല്‍ വിദഗ്ധന്‍ പാലാ പോണാട് കുന്നത്തോലിക്കല്‍ കെ.ആര്‍. രാമന്‍കുട്ടിയുടെ മകനാണ് കെ.ആര്‍. മണി. പിതാവില്‍നിന്നും തുള്ളലില്‍ ആദ്യപാഠങ്ങള്‍ സ്വായത്തമാക്കിയ മണി കേരള കലാമണ്ഡലത്തില്‍ ഉപരിപഠനം നടത്തി. കഴിഞ്ഞ 30 വര്‍ഷത്തിലധികമായി കേരളത്തിനകത്തും പുറത്തുമായി ഒട്ടേറെ അരങ്ങുകളിലും ദൂരദര്‍ശന്‍, ആകാശവാണി തുടങ്ങിയ ദൃശ്യശ്രാവ്യ മാധ്യമങ്ങളിലും തുള്ളല്‍ അവതരിപ്പിച്ചു വരുന്നു. കൂടാതെ സ്കൂള്‍ യുവജനോത്സവങ്ങളില്‍ നിരവധി കുട്ടികള്‍ക്ക് പരിശീലനം നല്‍കുകയും ചെയ്യുന്നു.
കല്യാണസൗഗന്ധികം, ഗുരുഡഗര്‍വഭംഗം, പാഞ്ചാലി സ്വയംവരം, സന്താനഗോപാലം, കിരാതം, കൃഷ്ണനാര്‍ജുന വിജയം, അക്ഷയ പാത്രം തുടങ്ങിയ കഥകളാണു പ്രധാനമായും അവതരിപ്പിച്ചു വരുന്നത്. സ്വന്തമായി കഥ എഴുതി ചിട്ടപ്പെടുത്തി നിരവധി വേദികളിലും ഓട്ടന്‍ തുള്ളല്‍ അവതരിപ്പിച്ചിട്ടുണ്ട്. അഖില കേരള തുള്ളല്‍ കലാസമിതിയുടെ സെക്രട്ടറി കൂടിയായ മണിക്ക് കലാ രംഗത്ത് നിരവധി പുരസ്കാരങ്ങളും ലഭിച്ചിട്ടുണ്ട്.
