ആലക്കോട്: കോടികള്‍ ചെലവഴിച്ചു നിര്‍മിച്ച റോഡ് ടാറിംഗിനു തൊട്ടുപിന്നാലെ തകര്‍ന്നതിനെ തുടര്‍ന്നു നാട്ടുകാരില്‍ പ്രതിഷേധം. ഉദയഗിരി പഞ്ചായത്തിലെ മുതുശേരി-പരപ്പ സെന്‍ട്രല്‍ റോഡാണു ടാറിംഗ് കഴിഞ്ഞു മാസങ്ങള്‍ കഴിയും മുമ്പു തകര്‍ന്നത്. പ്രധാനമന്ത്രിയുടെ ഗ്രാമീണ റോഡ് വികസന പദ്ധതി പ്രകാരം 1.81 കോടി രൂപ ചെലവഴിച്ചായിരുന്നു റോഡിന്റെ രണ്ടു കിലോമീറ്റര്‍ ദൂരം ടാറിംഗ് നടത്തിയത്. റോഡ് തകര്‍ന്നതിനെ തുടര്‍ന്നു നാട്ടുകാര്‍ ഈ ഭാഗത്തു വാഴനട്ടു പ്രതിഷേധിച്ചു. ടാറിംഗിലെ ക്രമക്കേടാണു റോഡ് തകരാന്‍ കാരണമെന്നാണു നാട്ടുകാരുടെ ആരോപണം. നിരവധി യാത്രക്കാരും വാഹനങ്ങളും കടന്നുപോകുന്ന റോഡ് തകര്‍ന്നതു നാട്ടുകാരില്‍ ശക്തമായ പ്രതിഷേധത്തിനു കാരണമായിട്ടുണ്ട്. മഴ ശക്തിയാകുന്നതോടെ റോഡ് കൂടുതല്‍ തകരുമെന്ന ആശങ്കയിലാണു ജനങ്ങള്‍.
ടാറിംഗിനു പിന്നാലെ റോഡ് തകര്‍ച്ച; നാട്ടുകാര്‍ വാഴ നട്ടു പ്രതിഷേധിച്ചു
