നേപ്പിയര്: ഫസ്റ്റ് ക്ലാസ് ക്രിക്കറ്റിന്റെ 254 വര്ഷത്തെ ചരിത്രത്തിനിടെ ആദ്യമായി ഒരു താരം തുടര്ച്ചയായ അഞ്ച് പന്തില് വിക്കറ്റ് വീഴ്ത്തി. ന്യൂസിലന്ഡ് ആഭ്യന്തര ഫസ്റ്റ് ക്ലാസ് ക്രിക്കറ്റ് ടൂര്ണമെന്റായ പ്ലങ്കറ്റ് ഷീല്ഡില് സെന്ട്രല് ഡിസ്ട്രിക്റ്റിന്റെ ബ്രെറ്റ് റാന്ഡലാണ് അത്യപൂര്വ ചരിത്രം സ്വന്തമാക്കിയത്. നോര്ത്തേണ് ഡിസ്ട്രിക്റ്റിന് എതിരായ മത്സരത്തില് ഫാസ്റ്റ് ബൗളറായ ബ്രെറ്റ് റാന്ഡല് 11 ഓവറില് 25 റണ്സ് വഴങ്ങി ഏഴ് വിക്കറ്റ് സ്വന്തമാക്കി.
സെന്ട്രല് ഡിസ്ട്രിക്റ്റിന്റെ ഒന്നാം ഇന്നിംഗ്സ് സ്കോറായ 373ന് എതിരേ, ഒന്നാം ഇന്നിംഗ്സിനായി ക്രീസില് എത്തിയപ്പോഴായിരുന്നു നോര്ത്തേണ് ഡിസ്ട്രിക്റ്റിനെ റാന്ഡല് എറിഞ്ഞിട്ടത്. 82 റണ്സില് ഒന്നാം ഇന്നിംഗ്സില് പുറത്തായ നോര്ത്തേണ് ഡിസ്ട്രിക്റ്റ് ഫോളോ ഓണ് വഴങ്ങി.
രണ്ടാംദിനം അവസാനിക്കുമ്പോള് രണ്ടാം ഇന്നിംഗ്സില് അഞ്ച് വിക്കറ്റ് നഷ്ടത്തില് 162 റണ്സ് നോര്ത്തേണ് ഡിസ്ട്രിക്റ്റ് നേടിയിട്ടുണ്ട്. രണ്ടാം ഇന്നിംഗ്സില് റാന്ഡലിന് വിക്കറ്റ് വീഴ്ത്താന് സാധിച്ചില്ല.
