കോട്ടയം: ആധുനികരീതിയില് നിര്മാണം പൂര്ത്തിയാക്കിയ സര്ജിക്കല് ബ്ലോക്ക് ഉള്പ്പെടെ കോട്ടയം മെഡിക്കല് കോളജിലെ 283 കോടി രൂപയുടെ വികസന പദ്ധതികള് മുഖ്യമന്ത്രി പിണറായി വിജയന് 16ന് നാടിനു സമര്പ്പിക്കും.
ഉച്ചകഴിഞ്ഞു മൂന്നിനു മെഡിക്കല് കോളജ് അങ്കണത്തില് നടക്കുന്ന ചടങ്ങില് മന്ത്രി വീണാ ജോര്ജ് അധ്യക്ഷത വഹിക്കും. സർജിക്കല് ബ്ലോക്കിനൊപ്പം മറ്റു 14 വികസനപദ്ധതികള് കൂടി ഉദ്ഘാടനം ചെയ്യും. 7.88 കോടി രൂപ ചെലവിട്ടു സ്ഥാപിച്ച കാത്ത് ലാബ്, ആറുകോടി രൂപ ചെലവിടുന്ന പാരാമെഡിക്കല് ഹോസ്റ്റലിന്റെ പൂര്ത്തിയാക്കിയ ഒന്നാംഘട്ടം, 4.28 കോടി ചെലവിട്ടു കാന്സര് ബ്ലോക്കില് സ്ഥാപിച്ച 32 സ്ലൈസ് സിടി സ്കാനിംഗ് സംവിധാനം, 1.25 കോടി ചെലവിട്ടു നവീകരിച്ച പ്രധാന കവാടം, 1.20 കോടി രൂപ ചെലവഴിച്ച് ഗൈനക്കോജളി വിഭാഗത്തില് ഒരുക്കിയ മാതൃ നവജാത ശിശുപരിചരണ യൂണിറ്റ് എന്നിവയാണു മറ്റു പ്രധാന പദ്ധതികള്.
എബിസി ബ്ലോക്കില് 74 ലക്ഷം രൂപ ചെലവിട്ടു നിര്മിക്കുന്ന പുതിയ ടോയ്ലറ്റ് ബ്ലോക്കിന്റെ ശിലാസ്ഥാപനവും ഇതോടനുബന്ധിച്ചു നടക്കും. കിന് ബാങ്ക് (64.57 ലക്ഷം രൂപ), ക്രഷ് (60 ലക്ഷം രൂപ), ലാക്റ്റേഷന് മാനേജ്മെന്റ് സെന്റര് (64.2 ലക്ഷം രൂപ), സിഎസ്ആര് ഫണ്ടുപയോഗിച്ചു ലഭ്യമാക്കിയ കാര്ഡിയാക് റീഹാബിലിറ്റേഷന് യൂണിറ്റ്-കാര്ഡിയോളജി ആന്ഡ് കാര്ഡിയോതൊറാസിക് ബ്ലോക്കിലെ ഉപകരണങ്ങള്, എക്കോ മെഷീന്, സിആം മെഷീന്, വെന്റിലേറ്ററുകള് എന്നിവയും ഉദ്ഘാടനം ചെയ്യും.
കിഫ്ബി പദ്ധതിയിലൂടെ 257 കോടി രൂപ ചെലവിട്ടു 33,642 ചതുരശ്ര മീറ്ററിലാണ് സര്ജിക്കല് ബ്ലോക്ക് സജ്ജമാക്കിയിട്ടുള്ളത്.
526 കിടക്കകള്, 44 ഐസിയു കിടക്കകള്, 14 ഓപ്പറേഷന് തിയറ്ററുകള് എന്നിവ പുതിയ ബ്ലോക്കിലുണ്ട്. 256 സ്ളൈസ് സിടി സ്കാന്, 3 ടെസ്ല എംആര്ഐ, ആധുനിക ഡിജിറ്റല് റേഡിയോഗ്രഫി മെഷീന്, ഫ്ളൂറോസ്കോപ്പി എന്നീ ഉപകരണങ്ങളും സജ്ജമാക്കിയിട്ടുണ്ട്.
മന്ത്രി വി.എന്. വാസവന്, മെഡിക്കല് കോളജ് സൂപ്രണ്ട് ഡോ. ടി.കെ. ജയകുമാര്, എംപിമാരായ കെ. ഫ്രാന്സിസ് ജോര്ജ്, ജോസ് കെ. മാണി, ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ്, ജില്ലാ കളക്ടര് ചേതന്കുമാര് മീണ, മെഡിക്കല് വിദ്യാഭ്യാസ ഡയറക്ടര് കെ.വി. വിശ്വനാഥന്, ജില്ലാ പഞ്ചായത്തംഗം ജിം അലക്സ്, ഏറ്റുമാനൂര് ബ്ലോക്ക് പഞ്ചായത്ത് പ്രസിഡന്റ് സി. ജയ്മോന്, ആര്പ്പൂക്കര പഞ്ചായത്ത് പ്രസിഡന്റ് ആനന്ദ് പഞ്ഞിക്കാരന്, അതിരമ്പുഴ പഞ്ചായത്ത് പ്രസിഡന്റ് ഒ.എ. സജി, ബ്ലോക്ക് പഞ്ചായത്തംഗം മറിയാമ്മ ഫിലിപ്പ്, പഞ്ചായത്തംഗം റോസിലി ടോമിച്ചന്, ജില്ലാ മെഡിക്കല് ഓഫീസര് ഡോ. എന്. പ്രിയ, മെഡിക്കല് കോളജ് പ്രിന്സിപ്പല് ഡോ. വര്ഗീസ് പി. പുന്നൂസ്, പൊതുമരാമത്ത് വകുപ്പ് എക്സിക്യൂട്ടീവ് എന്ജിനിയര് അരവിന്ദ് സച്ചില്, ദേശീയാരോഗ്യദൗത്യം ജില്ലാ പ്രോഗ്രാം മാനേജര് ഡോ. വ്യാസ് സുകുമാരന്. ഡെന്റല് കോളജ് പ്രിന്സിപ്പല് വി.പി. കണ്ണന്, നഴ്സിംഗ് കോളജ് പ്രിന്സിപ്പല് ലിനി ജോസഫ്, വൈസ്പ്രിന്സിപ്പല് ടി.ആര്. രാധ, കുട്ടികളുടെ ആശുപത്രി സൂപ്രണ്ട് കെ.പി. ജയപ്രകാശ്, ചീഫ് നഴ്സിംഗ് ഓഫീസര് പി.കെ. ഉഷ, ഡിസിഎച്ച് പ്രസിഡന്റ് സി.ജെ. ജോസഫ് എന്നിവര് പ്രസംഗിക്കും.
പത്രസമ്മേളനത്തില് മന്ത്രി വി.എന്. വാസവന്, മെഡിക്കല് കോളജ് സൂപ്രണ്ട് ഡോ. ടി.കെ. ജയകുമാര്, മെഡിക്കല് കോളജ് പ്രിന്സിപ്പല് ഡോ. വര്ഗീസ് പി. പുന്നൂസ് എന്നിവരും പങ്കെടുത്തു.
