മുംബൈ: ഓണ്‍ലൈൻ ഷോപ്പിംഗിൽ തട്ടിപ്പുകൾ വർധിച്ചുവരുന്നതായാണു റിപ്പോർട്ടുകൾ. ഓർഡർ ചെയ്തതല്ല ലഭിക്കുന്നതെന്നും തകരാറുകൾ സംഭവിച്ചവയാണെന്നുമുള്ള പരാതികളാണു കൂടുതലായി ഉയരുന്നത്. ഇതിനു തടയിടാൻ പ്രത്യേക നടപടി സ്വീകരിച്ചിരിക്കുകയാണ് ഓൺലൈൻ വ്യാപാര ഭീമൻമാരായ ആമസോൺ.
ഓർഡർ ചെയ്ത സാധനങ്ങൾ ലഭിച്ചാലുടൻ പാക്കേജിലെ ചില കാര്യങ്ങള്‍ ശ്രദ്ധിക്കണമെന്നാണ് ആമസോണ്‍ കന്പനിയുടെ നിർദേശം. പുതിയ ടാംപർ പ്രൂഫ് പാക്കേജിംഗ് സാങ്കേതികവിദ്യയാണ് കന്പനി ഉപയോഗിക്കുന്നത്. ഉപഭോക്താക്കള്‍ക്ക് പെട്ടെന്ന് തിരിച്ചറിയാൻ സാധിക്കുന്ന സീലുകളാണിത്. പിങ്ക് അല്ലെങ്കില്‍ ചുവപ്പ് ഡോട്ടുള്ള പ്രത്യേക ടേപ്പ് ആണ് സീലില്‍ ഉപയോഗിക്കുന്നത്. ചൂടാക്കിയശേഷം ടേപ്പ് നീക്കം ചെയ്യാൻ ശ്രമിച്ചാല്‍ ഡോട്ടിന്‍റെ നിറം മാറും എന്നതാണ് ഇതിന്‍റെ പ്രത്യേകത.
സാധാരണയായി ഡോട്ടുകള്‍ വെള്ളയായിരിക്കും. പാക്കേജ് തുറക്കാൻ ശ്രമിച്ചാല്‍ കുത്തുകൾ പിങ്ക് അല്ലെങ്കില്‍ ചുവപ്പായി മാറും. ഇതോടെ സീല്‍ പൊട്ടിച്ചതാണോ, വസ്തുക്കള്‍ മാറ്റിയതാണോ എന്ന് ഉപഭോക്താക്കള്‍ക്ക് മുൻകൂട്ടി അറിയാം. സീലിലെ ഡോട്ട് വെള്ള നിറമാണെങ്കില്‍ പാക്കേജ് ആരും തുറന്നിട്ടില്ലെന്ന് ഉറപ്പാക്കാം. പിങ്ക് അല്ലെങ്കിൽ ചുവപ്പ് നിറത്തിൽ ഡോട്ടുകള്‍ കണ്ടാല്‍ പാക്കേജ് മറ്റാരോ തുറന്നുവെന്നും മനസിലാക്കാം.
അത്തരം പാക്കേജുകള്‍ സ്വീകരിക്കരുതെന്നാണ് ആമസോണ്‍ നൽകുന്ന മുന്നറിയിപ്പ്. നിലവില്‍ മരുന്നുകള്‍, സൗന്ദര്യവർധക വസ്തുക്കള്‍ എന്നിവയുടെ പാക്കേജിലാണ് ഈ സീലുള്ളത്. ഭാവിയില്‍ മറ്റ് ഓർഡറുകളിലേക്കും പുതിയ പാക്കിംഗ് രീതി ഉപയോഗിക്കാനാണു നീക്കം.
