കോതമംഗലം: എംഎൽഎയോട് അപമര്യാദയായി പെരുമാറിയ എസ്ഐയെ സ്ഥലംമാറ്റി. കോതമംഗലം എംഎൽഎ ആന്‍റണി ജോണിനോട് അപമര്യാദയായി പെരുമാറിയ കോതമംഗലം സ്റ്റേഷനിലെ ഗ്രേഡ് എസ്ഐ കെ.സി. ബോസിനെതിരേയാണ് നടപടി.
ആലപ്പുഴ ജില്ലയിലെ കുത്തിയതോട് പോലീസ് സ്റ്റേഷനിലേക്കാണു സ്ഥലംമാറ്റം. വകുപ്പുതല നടപടിക്കായി റേഞ്ച് ഐജിയെ ഡിജിപി ചുമലപ്പെടുത്തി. ആന്‍റണിക്കെതിരേ വകുപ്പുതല നടപടിക്കും നിർദേശമുണ്ട്.
തിരക്കേറിയ തങ്കളം മലയിൻകീഴ് ബൈപാസ് റോഡിൽ മറ്റു വാഹനങ്ങൾക്ക് തടസമുണ്ടാക്കും വിധം പോലീസ് വാഹനം അലക്ഷ്യമായി പാർക്ക് ചെയ്ത് നടത്തിയ വാഹനപരിശോധന എംഎൽഎ ചോദ്യം ചെയ്തതാണ് എസ്ഐയെ ചൊടിപ്പിച്ചതെന്നു പറയുന്നു. മുഖ്യമന്ത്രി, ഡിജിപി എന്നിവർക്ക് ഇതുസംബന്ധിച്ച് എംഎൽഎ പരാതി നൽകിയിരുന്നു.
