തിരുവനന്തപുരം: ശമ്പള പരിഷ്കരണം നടത്താത്തതില് പ്രതിഷേധിച്ച് സംസ്ഥാനത്തെ സ്വകാര്യാശുപത്രിയിലെ നഴ്സുമാര് പണിമുടക്കി പ്രതിഷേധത്തില്. യുഎന്എയുടെ നേതൃത്വത്തിലാണ് നഴ്സുമാര് പണിമുടക്കി സെക്രട്ടറിയേറ്റിന് മുന്നില് പ്രതിഷേധിക്കുന്നത്.
മാസശമ്പളം നാല്പ്പതിനായിരം രൂപയാക്കി വര്ധിപ്പിക്കണമെന്നാണ് നഴ്സുമാരുടെ ആവശ്യം. നിലവില് ഇരുപതിനായിരം രൂപമാത്രമാണ് ശമ്പളമായി ലഭിക്കുന്നത്. കുടുംബ ചെലവുകള് നടത്താന് ഈ തുക കൊണ്ട് സാധിക്കുന്നില്ലെന്നും വിദ്യാഭ്യാസ ലോണും മറ്റ് ലോണുകളും അടയ്ക്കാന് തന്നെ സാധിക്കാത്ത അവസ്ഥയാണെന്നുമാണ് നഴ്സുമാര് വ്യക്തമാക്കുന്നത്.
പതിനാല് മണിക്കൂറിലേറെ സമയം ജോലി നോക്കിയിട്ടും മതിയായ പ്രതിഫലം ലഭിക്കുന്നില്ലെന്നും നീതി ലഭിക്കണമെന്നുമാണ് നഴ്സുമാരുടെ ആവശ്യം. സ്വകാര്യാശുപത്രിയില് ഇന്ന് അത്യാഹിത വിഭാഗത്തില് മാത്രമാണ് നഴ്സുമാരുടെ സേവനമുള്ളത്.
ഇന്ന് രാവിലെയോടെ കേരളത്തിലെ വിവിധ ജില്ലകളില് നിന്നുളള നഴ്സുമാര് തിരുവനന്തപുരത്തെത്തി. പാളയം ചന്ദ്രശേഖരന് നായര് സ്റ്റേഡിയത്തില് നിന്നുമാണ് നഴ്സുമാര് സെക്രട്ടറിയേറ്റിലേക്ക് മാര്ച്ചും ധര്ണയും നടത്തിയത്.
